Dŭm anôk mâo klei ruă mnŭ ada anăn ti 2 gŏ sang hlăm alŭ 11 leh anăn alŭ 5 să Ea Kli. Hlăm anăn, anôk mâo klei ruă tal êlâo dưi čih yap hruê 29/10 ti gŏ sang Nguyễn Nhu Lực, ti alŭ 11 hŏng giăm 800 drei mnŭ ada mâo klei ruă. Anôk mâo klei ruă tal 2 dưi hmao ƀuh hruê 5/11, ti gŏ sang Ngô Đức Tình hlăm alŭ 5, hŏng 750 drei mnŭ ada mâo klei ruă, hlăm anăn mâo 500 drei bip leh anăn 250 drei mnŭ.

Leh hmư̆ klei hưn kơ dŭm anôk mâo klei ruă, phung ngă bruă mdrao mgŭn kơ mnơ̆ng rông mă leh mta ksiêm mkă, boh tŭ ƀuh mâo kman klei ruă mnŭ ada H5N1. Anôk bruă rông mnơ̆ng leh anăn mdrao kơ mnơ̆ng rông bi mguôp hŏng bruă sang čư êa alŭ wăl ngă bruă čuh bi rai jih jang mnŭ ada mâo klei ruă, krih êa drao mdjiê kmam ti war rông, djŭm dar ƀăng čuh leh anăn alŭ wăl jĕ giăm. Anôk bruă rông mnơ̆ng leh anăn mdrao kơ mnơ̆ng rông čar Dak Lak mkăp brei leh 36 lit êa drao čiăng kơ alŭ wăl ngă bruă kriê êa drao mdjiê kman, bi mguôp hŏng anôk bruă ksiêm dlăng klei ruă tưp čar Dak Lak ksiêm duah, ksiêm dlăng klei ruă mnŭ ada tưp kơ mnuih ti alŭ wăl să Ea Kli.