Klei bi kƀĭn dưi mkŏ mjing leh dŭm klei amâo uêñ, bi mmiă leh anăn bi đing amâo klă mngač mơ̆ng anôk bruă duh mkra ba čhĭ boh durian kơ ala tač êngao ti Dak Lak dôk tuôm leh dŭm hnơ̆ng boh durian dưi ba čhĭ klă mngač. Hlue si klei hâo hưn hlăm klei bi kƀĭn, truh ară anei Dak Lak pla leh êbeh 15.200 ha durian, đĭ 13 êbâo ha mkă hŏng 2015. Hnơ̆ng thŭn 2022 mâo êbeh 150 êbâo ton, leh anăn mĭn tĭng srăng đĭ truh 300 êbâo ton hlăm thŭn 2025.

Kơ hnơ̆ng ba čhĭ kơ ala tač êngao, thŭn 2022 jing thŭn tal êlâo boh durian Dak Lak msĕ mơh kluôm ala dưi ba čhĭ ko China, anôk ba čhĭ 99% hnơ̆ng boh durian dlông rŏng lăn. Čiăng msir mgaih jih hnơ̆ng klei gun kpăk hlăm bruă bi hgŭm mđĭ kyar bruă boh durian, mđĭ hnơ̆ng bi ktưn hlăm bruă ba čhĭ, Khua gĭt gai Knơ̆ng bruă sang čư̆ êa čar Dak Lak mtă kơ dŭm anôk bruă djŏ tuôm mđĭ hnơ̆ng kriê dlăng, bi hgŭm bi jăk leh anăn msir mgaih klei mâo, mđi mkŏ mjing êpul hgŭm durian čiăng bi mrâo mrang thơ̆ng kơ bruă mta ba čhĭ mâo klei găl anei.