Hlăm kngan djă đĭng blŭ thâo mĭn leh anăn mơ̆ng dŭm klei ngă ênưih msĕ si mă rup, čih klah čŭn kơ mnơ̆ng dhơng, phŭn agha, ênoh, hdră đru mdul, Đồng Xuân Liên, Khua Êpul hgŭm bruă Nam Bình, kdriêk Dak Song, čar Dak Nông ba leh tiu jŭ hlăm anôk mnia blei điện tử Postmart. Liền brei thâo, 2 mlan êlâo Êpul hgŭm lŏ hma čar leh anăn bruă dang kông čar bi hgŭm mkŏ mjing gưl hriăm mjuăt kơ dŭm êpul hgŭm bruă čiăng ba mnơ̆ng dhơ̆ng lŏ hma kơ anôk mnia blei điện tử.

Tal êlâo ñu leh anăn phung hlăm êpul bi hgŭm ka thâo săng ôh, ƀiădah hŏng klei ktrâo lač klă mngač, ară anei bruă ba mnơ̆ng dhơ̆ng pô hlăm anôk ba čhĭ online găl ênưih leh anăn tal êlâo dưi mâo leh hră akâo blei anăn ñu mơak snăk:

“Mơ̆ng mmông hriăm mjuăt, ksiêm hriăm hlăm hră mơar hriăm mjuăt mbĭt anăn, brei anak čô ktrâo thiăm snăn tal êlâo kâo dưi ba mnơ̆ng dhơ̆ng êpul hgŭm bruă hlăm anôk ba čhĭ điện tử kâo mơak snăk. Leh sa wưng bhiâo mâo leh hră akâo blei, khăgơ̆ ka mâo lu ôh ƀiădah mâo leh hră akâo blei kơ êpul hgŭm bruă, anei jing klei mơak snăk.”

Ƀĭng ngă lŏ hma ti Dak Nông amâo guôn nao ti sang mnia ôh, dôk ti sang, yua đĭng blŭ dưu čhĭ mnơ̆ng hlăm anôk mnia blei điện tử

 Mơ̆ng leh bi mlih hdră čih mnơ̆ng hlăm anôk ba čhĭ điện tử, Nguyễn Thị Ngọc Sen ti ƀuôn hgŭm Nghiã Đức, ƀuôn prŏng Gia Nghiã amâo lŏ guôn hiu duah čhĭ kmŭn tŭk msĕ si êlâo ôh. Ñu brei thâo, êlâo adih, boh kmŭn tŭk leh prŏng dưm hlăm anôk sang mnia kơ phung mưng blei. Mơ̆ng leh hgŭm hlăm anôk mnia blei điện tử, ñu knŏng hrui blei, đuh hruh bi jăk srăng mâo phung mă bruă săng kông nao mă, dŭ mdiăng ba kơ phung blei. Klei hâo hưn hlăm anôk mnia blei điện tử mơ̆ng sen brei thâo, kmŭn tŭk msĕ si: Kim Long, Hoàng Long, Kim Hoàng Hậu… dưi pla hlăm sang ală kĭng hlue si VietGap. Hdră kčah kriê dlăng, pruê hbâo, krih êa… dưi ngă hlue si hdră mkiêt mkriêm. Lăm klei amâo thâo săng tal êlâo kơ hdră, Sen mơak leh mnơ̆ng pô pla mjing dưi ba čhĭ tŭ jing, mâo lu mnuih akâo blei hĭn:

“Mâo êpul hgŭm ƀĭng ngă lŏ hma čar iêô nao hlăm klei bi trông snăn kâo thâo boh kmŭn tuk dưi ba hlăm anôk nia blei điện tử Postmart Dak Nông. Ăt mơak snăk, dưi mkŏ mnơ̆ng dhơ̆ng pô ti êngao čar čiăng kơ mnơ̆ng dhơ̆ng pô ƀrư̆ hruê ƀrư̆ đĭ. Ară anei sa wưng dưi ba čhĭ mâo 1 toh mkrah ƀiădah čang hmăng êdei anei sa wưng brei bi mâo 4-5 ton snăn prăk hrui wĭt pô srăng đĭ.”

Ba mnơ̆ng dhơ̆ng lŏ hma hlăm anôk mnia blei điện tử đru kơ ƀĭng ngă lŏ hma čar Dak Nông mâo thiăm anôk ba čhĭ mnơ̆ng dhơ̆ng, pral hĭn hlăm bruă duah anôk čhĭ mnơ̆ng dhơ̆ng lŏ hma

 Dôk hlăm hdră mđĭ bi mlih mrô hlăm bruă lŏ hma. Êpul hgŭm ƀĭng ngă lŏ hma čar Dak Nông bi hgŭm hŏng bruă Dang Kông čar mkŏ mjing hriăm mjuăt kơ ƀĭng ngă lŏ hma hdră ba mnơ̆ng hlăm hdră mnia blei điện tử Postmart.  Leh adŭ hriăm mjuăt leh anăn dŭm gưl ktrâo lač, kăp đru, truh ară anei mâo leh 38 mta mnơ̆ng dhơ̆ng mơ̆ng 28 gŏ êsei pla mjing hlăm čar dưi mâo anăn knăl hlă anôk ba čhĭ bruă dăng kông. Hồ Gấm - Khua Êpul hgŭm ƀĭng ngă lŏ hma čar Dak Nông brei thâo, ară anei, ƀĭng ngă lŏ hma leh anăn dŭm êpul hgŭm bruă, anôk bruă mnia blei adôk tuôm hŏng lu klei dleh dlan kơ bruă tŭ mă klei hâo hưn, hră mơar bi mklă hnơ̆ng čuăn mnơ̆ng dhơ̆ng jăk čiăng ba hlăm anôk ba čhĭ điện tử. Kyua anăn, bruă đru kơ ƀĭng ngă lŏ hma leh anăn dŭm êpul hgŭm bryă wưng anei jing čiăng êdi:

“Hmei čang hmăng êlâo hĭn jih jang dŭm mta mnơ̆ng dhơ̆ng djăp hnơ̆ng čiăn OCOP snăn brei dưi ba hlăm anôk ba čhĭ, dưi ksiêm dlăng hnơ̆ng jăk leh anăn mâo hnơ̆ng lu, mâo kơhưm hlăm bruă duh mkra. Ƀrư̆ ƀrơ̆ hmei ba jih dŭm mta mnơ̆ng dhơ̆ng hlăm anôk ba čhĭ, mnia blei, bi trông klă mngač, ênưih hrui mă, ênưih mkăp.”

Ba čhĭ hlăm anôk mnia blei điện tử, boh mnga lŏ hma mơ̆ng ƀĭng ngă lŏ hma Dak Nông mâo klei găl klă mngač kơ klei hâo hưn mnơ̆ng dhơ̆ng, hưn mdah, mđĭ klei găl mâo phung blei yua blei, ƀiădah ăt brei djăp hnơ̆ng jăk, mta mnơ̆ng dhơ̆ng. Kyua dŭm klei anei brei mnuih ƀuôn sang bi mlih hdră mkra mjing, mđing kơ dŭm klei êđăp ênang, mđĭ hnơ̆ng jăk mnơ̆ng dhơ̆ng, kriê dlăng leh anăn mkra mjing leh hrui mă jăk hĭn. Mâo snăn kơh, bruă dưm hlăm anôk ba čhĭ điện tử klă sĭt mâo klei tŭ dưn, čiăng kơ ƀĭng ngă lŏ hma čŏng mjing klei găl kơ mnơ̆ng dhơ̆ng pô./.