Hlăm dŭm hruê anei, gŏ sang Y Kem, ti ƀon Bu Păh, să Trường Xuân, kdriêk Dak Song, dôk amâo hơĭt pĭt amâo mđao kyua đang kphê gŏ sang arăng mrâo tlĕ pĕ. Y Kem brei thâo, êbeh 50 phŭn kphê arăng pĕ, luič liê hlăm brô 400kg. Anei amâo djŏ knŏng jing gưl tal êlâo arăng tlĕ kphê ñu ôh, kyua đang kphê kbưi hŏng sang êbeh 1 km:

3 thŭn hŏng anei, luič kphê tĭng nah nei. Kyua yan kphê lu mnuih ti dŭm alŭ mkăn hriê pĕ kphê mưn, pô amâo thâo hlei pô ôh, ti alŭ, kyua anăn sĭt luič snăn pô ăt dleh thâo ƀuh mơh.

Dưi thâo ăt ti alŭ wăl anei klei hrui pĕ thŭn êlâo, mâo dua gŏ sang arăng tlĕ pĕ kphê. Čiăng răng mgang ngăn drăp, mnuih ƀuôn sang mâo đang kphê hlăm krĭng bi hgŭm mbĭt mkŏ mjing hiu ksiêm dlăng hlăm mmăt. Ƀiădah bruă luič tlĕ dăp ăt mâo kyua đang kphê prŏng, kbưi hŏng krĭng ƀuôn sang leh anăn mâo lu ktuê êlan. Kyua anăn, êngao kơ bruă bi hgŭm mđĭ hiu ksiêm dlăng, ti dŭm ktuê êlan mnuih ƀuôn sang lŏ dưm camera ksiêm dlăng čiăng gang mkhư̆ phung tlĕ dăp. Lê Ngọc Ga, ti să Trường Xuân, kdriêk Dak Song, brei thâo:

 “Mmăt snăn khăng nao dlăng hma. Leh anăn pô dưm thiăm camera čiăng ksiêm dlăng ti anăp sang, hluê êlan nao. Sĭt knuă druh čiăng snăn pô brei dlăng camera anăn čiăng diñu thâo ƀuh mă phung bi rai amâodah tlĕ mnơ̆ng dhơ̆ng, čiăng kơ mnuih ƀuôn sang pla mjing kphê hơĭt ai tiê hĭn.”

 Klei tlĕ kphê ngă kơ mnuih ƀuôn sang rŭng răng snăk, kyua diñu amâo djŏ knŏng luič ngăn drăp ôh, ƀiădah ana kphê arăng khăng đăk jih adhan, dleh lŏ kriê dlăng kơrŭ wĭt, srăng hrŏ hnơ̆ng kơ yan anăp. Amâo djŏ knŏng tlĕ dăp ôh, lu phung bi mjhua yan hrui pĕ kphê čiăng hiu tlĕ. Mrâo anei, sa gŏ êsei mnuih ƀuôn sang ti să Dăk Sin, kdriêk Dak Rlâp, arăng tlĕ mă êdeh p’phŭt leh anăn prăk, mah leh anăn tlĕ đuê̆. Bi ti ƀuôn hgŭm Quảng Thành (ƀuôn prŏng Gia Nghĩa), êpul kahan ksiêm ƀuh sa čô mnuih hiu đuĕ dăp mŭt hlăm êpul nao pĕ kphê mưn…

Čiăng rơ̆ng klei êđăp ênang hlăm yan pĕ kphê, dŭm alŭ wăl ti Dak Nông mđĭ ktang bruă hâo hưn mtô mblang, hưn brei răng dŭm hdră mnêč phung ngă soh. Êpul kahan ksiêm anôk bruă nah gŭ ăt mđĭ ktang hiu ksiêm dlăng ti dŭm anôk kreh mâo klei hiu tlĕ, ksiêm dlăng klei dôh jưh mơ̆ng phung hiu mă bruă mưn hlue si yan…Kahan ksiêm Dak Nông mtă kơ mnuih ƀuôn sang răng sĭt mưn mnuih mă bruă brei ksiêm dlăng hră mơar leh anăn ngă djŏ hră dôk jưh êjai hlue si hdră kčah.

Đại úy Nguyễn Văn Đô, K’iăng Khua kahan ksiêm să Trường Xuân brei thâo, mbĭt hŏng êpul bruă djŏ tuôm, klei răng mơ̆ng mnuih ƀuôn sang srăng đru mkhư̆ phung ngă soh mâo hlăm yan pĕ kphê. Msĕ si bruă gŏ sang Y-Kem, kahan ksiêm ktuê dlăng, pral mâo mă 5 čô tlĕ pĕ kphê. Đại Úy Nguyễn Văn Đô brei thâo:

Hlăm yan hrui pĕ kphê grăp thŭn snăn mnuih ƀuôn sang să ăt mkŏ mjing hdră kčah răng mgang yan boh mnga, hâo hưn čiăng kơ mnuih ƀuôn sang thâo săng hdră gang mkhư̆ phung ngă soh, boh nik phung tlĕ mnơ̆ng dhơ̆ng. Kahan ksiêm să ăt khăng bi hgŭm hŏng dŭm êpul răng mgang klei êđăp ênang hiu ksiêm dlăng čiăng bi hrŏ klei luič liê mơ̆ng mnuih ƀuôn sang hlăm yan hrui pĕ. Êngao anăn snăn ăt păn kjăp ênoh mnuih mơ̆ng anôk mkăn hriê mă bruă mưn amâodah hdĭp mda; leh anăn kreh mtăn mtăn, bi mhuĭ phung mâo klei bi knăl tlĕ mnơ̆ng dhơ̆ng./.