Anei jing wưng čiăng kơ phung duh mkra, lehanăn čhĭ tiu kơ ala tač êngao bi trông kơ hdră êlan duh mkra, bi đru kơ bruă mghaih msir djăp mta klei dleh dlan, klei gun kpăk. Kñăm mđĭ kyar bruă tiu hŏng tar rŏng lăn. Tui si Hoàng Thị Liên, Khua êpul hgŭm bruă tiu Việt Nam, hnơ̆ng jăk tiu jing ênoh čuăn prŏng snăk.

Ti anôk bi kƀĭn Vũ Bá Phú, khua kiă kriê anôk bruă duh mkra mnia mblei mơ̆ng phŭn bruă duh mkra mnia mblei brei thâo, Việt Nam ară anei jing ala čar pla mjing tiu prŏng dlông rŏng lăn. Thŭn 2022, mâo čhĭ leh kơ ala tač êngao truh 220 êbâo tôn, truh 55% hnơ̆ng tiu mâo tar rŏng lăn. Siămdah, tiu čiăng kơ tiu Việt Nam mâo anăn hŏng ala tač êngao jing sa mta klei adôk lu mta bruă lŏ dơ̆ng ngă./.