Wưng thŭn 2017 – 2022, kah knar grăp thŭn čar Gia Lai mâo 63 êbâo gŏ sang ƀĭng ngă lŏ hma mkra mjing mnia mblei kdlưn hĭn dŭm gưl, hlăm anăn mâo 297 gŏ sang ƀĭng ngă lŏ hma mkra mjing, mnia mblei kdlưn hĭn ti gưl dlông. Dŭm gŏ sang anei đru mkŏ mjing bruă mă kơ êbeh 320.000 čô mnuih mă bruă, hnư hrui wĭt mơ̆ng 4 êklăk 500 êbâo prăk truh kơ 6 êklăk prăk hlăm sa mlan.

Dŭm gŏ sang anei ăt đru mkŏ wĭt bruă pla mjing, rông mnơ̆ng, dưn yua hdră mnêč mrâo hlăm klei ngă bruă, mđĭ ai hdră gĭr ktưn tlaih mơ̆ng klei ƀun ƀin, kpưn đĭ kơ mdrŏng, hrăm mbĭt mkŏ mkra krĭng ƀuôn sang mrâo. Wưng thŭn 2017 – 2022, dŭm gưl lŏ bi klă pŏk phai, mtrŭt mđĭ hdră anei ƀrư̆ hruê ƀrư̆ êlam hĭn, klă klơ̆ng hĭn leh anăn mâo boh tŭ dưn hĭn. Wưng anei, bruă sang čư êa čar Gia Lai mđup brei leh hră pah mni kơ 18 êpul êya, 94 čô. Êpul hgŭm ƀĭng ngă lŏ hma čar mđup brei hră pah mni kơ 17 êpul êya leh anăn 42 čô ƀĭng ngă lŏ hma mkra mjing, mnia mblei kdlưn hĭn wưng thŭn 2017 – 2022.