Hlăm klei bi tuôm, dua khua gĭt gai bi êdah klei ư ai dlăng klei bi hgŭm kluôm Việt Nam – Philippines đĭ kyar jăk siam wăt tơdah tuôm hŏng lu klei dleh dlan kyua Covid-19; boh nik bi mni kơ bruă dua tĭng mđĭ lar klei tŭ dưn ngă bruă bi tuôm gưl dlông. Bi trông bruă mnia blei dua nah đĭ kyar ktang, prăk hrui wĭt mơ̆ng ala tač êngao thŭn 2021 mâo 6 êklai 8 êtuh êklăk USD, lu hĭn mơ̆ng êlâo truh ară anei, hlăm 8 mlan akŏ thŭn anei, ênoh anei mâo giăm 5 êklai 4 êtuh êklăk USD.

Khua knŭk kna Phạm Minh Chính mtă kơ dua tĭng mprăp bi jăk kơ gưl nao čhưn Philipines kơ anăp mơ̆ng Khua bruă kƀĭn ala Vương Đình Huệ. Brei dua ala čar mđĭ bruă mnia blei, hlăm anăn mnia blei braih, ksiêm dlăng lăm lui klei ngă gun kpăk amâo čiăng êdi, ,mjing wăl mnia blei leh anăn duh bi liê găl ênưih kơ anôk bruă duh mkra, mđĭ klei mnia blei mnơ̆ng dhơ̆ng lŏ hma, boh nik mnơ̆ng dhơ̆ng mâo  ênoh yuôm. Khua knŭk kna mtă kơ Philippines lŏ dơ̆ng mđing dlăng, mjing klei găl kơ mnuih Việt Nam mă bruă, hdĭp mda ti Philippines./.