Gia Lai mâo lu bruă duh mkra pla mjing, lehanăn bruă dliê kyâo pioh čhĭ mnia hŏng ala tač êngao, hmăi tuôm hŏng klei bhiăn mơ̆ng EU bi kdơ̆ng hŏng klei luič rai dliê, mâo bruă pla mjing kphê, ksu, kyâo lehanăn dŭm mta mnơ̆ng mkra mjing mơ̆ng kyâo. Jih jang mnơ̆ng anei hlăk ba wĭt ênoh prăk bi mnia mblei hŏng ala tač êngao lu hlăm brô mơ̆ng 500 - 600 êklăk USD kơ čar. Hlăm anăn EU jing anôk bi mnia mblei yuôm bhăn. Tui si ênoh čoh čuăn mrâo mơ̆ng EU, phung duh mkra brei hưn mdah klă ênŭm phŭn agha anôk pla mjing djŏ tui si klei bhiăn, rơ̆ng amâo mâo mă ôh jing mnơ̆ng mơ̆ng dliê leh bi rai, amâodah dah dliê tŭl.

Lê Đức Vương- knuă druh mơ̆ng knơ̆ng bruă Nestle Việt Nam ti Gia Lai brei thâo, leh EU hưn mthâo kơ klei bhiăn mă bruă, jih jang phung duh mkra prŏng hlăm klei bi mnia mblei kơ kphê čhĭ kơ EU čŏng ngă leh ênŭm djŏ tui si klei bhiăn čoh cuăn.  Hlăm anăn phung duh mkra điêt lehanăn dŭm gŏ sang pla mjing tuôm hŏng lu klei dleh dlan, kyua kƀah bruă hlue ngă klei hưn mthâo klă phŭn agha, lehanăn kƀah klei thâo mă bruă. Siămdah, jih jang mta mtrŭn anei jing pŏk klei găl kơ phung duh mkra Gia Lai mđĭ klei tŭ dưn kơ anăn knăl, mjing djăp klei găl hlăm klei bi ktưn ti anôk čhĭ mnia hlăm EU:

 “Phŭn bruă lŏ hma lehanăn wăl hdĭp mda đru leh kơ phung duh mkra ƀuh klei tŭ dưn tơdah hlue ngă ênŭm klei čoh čuăn bi kdơ̆ng hŏng klei bi rai dliê, lehanăn mâo bi mklă djŏ. Hŏng phung duh mkra điêt, lehanăn dŭm gŏ sang pla mjing snăn bi ngă hĕ polygon (sa kdrăp mrâo mrang đru hưn mthâo phŭn agha mnơ̆ng pô pla mjing), lehanăn ktrâo anôk pô mă bruă. Tơdah ngă amâo mâo djŏ ôh, snăn mgi dih srăng dleh lehanăn luič liê lu. 100 - 200 gŏ sang snăn ênưih, ƀiădah truh dŭm pluh êbâo gŏ sang snăn jing dleh. Kphê čhĭ kơ EU, bi mâo hră tŭ yap EUDR snăn kơh dưi čhĭ mnia jăk, yuôm hĭn hŏng ênoh kphê aguah tlam. Jing jăk snăk tơdah klei anei mđĭ ai phung duh mkra dưi mâo klei pah mưn, tơdah diñu hlue ngă djŏ mta mtrŭn anei. Anei jing boh kdrŭn prŏng êdi”.

Tui si phung thơ̆ng kơ bruă bi mnia mblei, lehanăn anôk bi mnia mblei, čiăng dưi hlue ngă djŏ hŏng klei bhiăn EUDR, phung duh mkra bi pral mkŏ mjing hdră êlan mă bruă, kñăm hưn mthâo klă mngac phŭn agha anôk pla mjing, dưi ba yua kdrăp mrâo blockchain pioh kăp hưn klă mngač djăp mta bruă; bi hgŭm hŏng dŭm êpul bruă kăp ksiêm jih jang bruă ngă amâo mâo bi rai dliê, dưn yua hdră pla mjing hlue hdră êlan kjăp, bi hrŏ ya mta bruă ngă hmăi amâo mâo jăk hŏng wăl hdĭp mda.

Mbĭt anăn, Gialai lehanăn kluôm lăn dap kngư, čŏng nao bi hgŭm hlăm jih jang bruă, mâo klei bi mlih kjăp, mđĭ hnơ̆ng thâo săng hlăm mnuih ƀuôn sang pla mjing hŏng klei yuôm bhăn hlue ngă klei mă bruă hlue hdră êlan kjăp. Bùi Đức Hào- Dôk hlăm êpul bruă ksiêm duah klei bi mnia mblei kjăp, brei thâo:

 “Knŏng dŭm mlan leh êpul hgŭm Ơrôp mtrŭn klei bhiăn anei, snăn phŭn bruă lŏ hma lehanăn wăl hdĭp mda mâo mtam hdră êlan mă bruă, mkŏ mjing klei čuăl mkă krĭng pla mjing, lehanăn hlue ngă djăp klei bhiăn mă bruă kơ krĭng pla mjing, lehanăn dưn yua hdră êlan mă bruă bi djŏ hŏng EUDR. Dŭm boh čar ăt dơ̆ng ngă bruă anei. Kphê ti Gia Lai mâo pla mjing hlăm dŭm kdriêk, dôk hlăm krĭng taih kbưi, sĭt nik srăng dleh dlan hĭn. Ƀiădah, Gia Lai ăt jing čar tal êlâo mâo êpul mă bruă ODA, snăn srăng mjing djăp klei găl tinăp mă bruă tŭ jing lehanăn jăk siam hĭn”./.