Thŭn 2024, ba čhĭ kphê mơ̆ng Việt Nam mâo 1,32 êklăk ton, prăk hrui wĭt giăm 5,5 êklai USD. Wăt tơdah mâo klei găl prŏng, bruă kphê Việt Nam tuôm hŏng lu klei lông dlăng hlăm bruă mđĭ kyar kjăp, boh nik hlăm bruă kriê dlăng djah leh anăn yua kdrăp mnơ̆ng lŏ hma.

Čiăng mđĭ bruă kphê đĭ kyar kjăp, mlan 6/2024, hdră bruă “Mkŏ mjing klei bi blŭ hrăm hdră êlan, mđĭ klei dưi leh anăn klei thâo săng kơ klei yua mnơ̆ng dhơ̆ng lŏ hma mâo bruă klam, hrui mƀĭn leh anăn msir mgaih djah hlăm bruă mkra mjing kphê ti Việt Nam” klă sĭt mphŭn pŏk. Hŏng klei kñăm bi hrŏ klei bi kpleh prăk hrui wĭt kơ ƀiă êdi 150 êbâo gŏ êsei ƀĭng lŏ hma pla kphê ti Việt Nam hlăm thŭn 2030, phung bi ala bi trông kơ klei hriăm mơ̆ng hdră bruă; kah mbha gru hmô, hdră msir mkra mjing tŭ dưn, hơĭt kjăp; dŭm hdră ba yua mnơ̆ng dhơ̆ng lŏ hma mrâo mrang, hrui mƀĭn djah djâo… Mbĭt anăn, kčĕ hdră êlan leh anăn mjing klei mkŏ dŭm tĭng djŏ tuôm hlăm klei mđĭ kyar kphê hơĭt kjăp ti Việt Nam.