Bruă mkra êlan nah ngŏ ƀuôn prŏng Pleiku mâo boh taih 15km, prăk duh bi liê êbeh 1.300 êklai prăk, đru mkŏ ƀuôn prŏng hŏng dŭm kdriêk Đak Đoa, Chư Păh, găn hlăm dŭm anôk hiu čhưn ênguê hing ang mơ̆ng čar. Anăn pia “êlan kơ klei duh mkra” brei ƀuh čar Gia Lai mâo leh lu klei čang hmăng kơ bruă anei, ƀiădah bruă dôk mkra êlan anei bŏ hŏng klei êmưt.

Khădah mphŭn rŭ mkra mơ̆ng knhal jih thŭn 2022, čang hmăng srăng hluh êlan lehanăn dưi găn êrô hlăm krah thŭn 2025, ƀiădah truh kơ ară anei êlan anăn knŏng mâo mkra mil 46% kdrêč bruă, mâo bi liê mă 740 êklai prăk. Tui si Phạm Xuân Điệp – Khua anôk bruă kiă kriê klei duh bi liê rŭ mdơ̆ng čar Gia Lai, êpul êya bruă hlăk jih ai tiê dôk mghaih msir klei dleh kpăk:

 “Tui si klei gĭt gai mơ̆ng knŭk kna, lehanăn knơ̆ng bruă sang čư̆ êa čar, tui si hdră mă bruă hlăm thŭn anei, snăn brei bi liê ênŭm truh 95%. Mơ̆ng ênoh kčah čuăn anăn, bi djŏ hŏng grăp mta bruă, boh nik jing dŭm mta bruă phŭn, kñăm čiăng bi leh bruă bi liê ngăn prăk hlăm thŭn. Snăn ƀuh dŭm klei dleh dlan gun kpăk kơ bruă mkra êlan ăt mâo ruh mgaih”.

Ti kdriêk Chư Păh, klei duh bi liê ngăn prăk kơ bruă kluôm dôk êmưt snăk. Hlăm anăn ênoh jih jang 117 êklai prăk kơ thŭn 2025, kdriêk mrâo bi liê mă êbeh  3 êklai prăk, knŏng djăp êbeh 2% hdră kčah. Dŭm bruă rŭ mkra phŭn ti Chư Pảh, lu jing hlăm êpul dôk bi ngă bruă, hŏng dŭm bruă mrâo ăt dôk guôn ngă hră mơar. Đặng Thái Huy – Khua kiă kriê bruă rŭ mdơ̆ng kdriêk Chư Păh (Gia Lai) brei thâo, sa kdrêč klei dleh dlan, jing dôk kpăk gun mơ̆ng bruă bi mŭt dŭm anôk bruă, êpul êya ti kdriêk:

 “Ăt kyua mơ̆ng bruă bi mŭt mơh hlue si hră mơar gĭt gai mơ̆ng čar, jing mdei jih jang bruă dôk ngă, lehanăn mâo klei djŏ tuôm hŏng gưl să, snăn anôk bruă kiă kriê ăt êmưt mơh bi liê ngăn prăk. Anăp anei hlăm mlan 5, mlan 6 êpul kiă kriê bruă knuă srăng kruak ênoh bruă, čiăng kơ dŭm êpul êya ngă bruă bi tĭng kơ ênoh ngăn prăk bi liê kơ bruă knuă truh hŏng kdriêk”.

Čar Gia Lai mâo jao leh ênoh prăk duh bi liê êbeh 4.500 êklai prăk, mâo wăt ênoh čuăn thŭn 2025 lehanăn lŏ mguôp prăk mơ̆ng thŭn 2024. Hlăm anăn prăk alŭ wăl êbeh 2.600 êklai prăk, dŭm adôk jing prăk mơ̆ng gưl dlông giăm  1.900 êklai prăk. Siămdah, truh ară anei ăt dôk 12 kdriêk, wăl krah ka kah ênŭm ôh ênoh prăk bi liê kơ dŭm bruă čiăng ngă, knŏng mil êbeh 10%, hlăm sa ênoh điêt êdi hŏng klei dôk čiăng kơ bruă knuă.

Ti anăp klei anei, čar Gia Lai hlăk dôk ngă lu hdră. Hlăm anăn mkŏ mjing  4 êpul mă bruă mâo dŭm k’iăng khua knơ̆ng bruă čar klam bruă. Dŭm êpul bruă anei, mtrŭt kơ bruă ruh mgaih anôk ala, bi mlih mta mtrŭn klei čiu hnô, lehanăn mđĭ klei dưi tui duah ngăn prăk lehanăn bi liê hŏng klei mbruă. Hŏng klei gĭr prŏng jih jang mă bruă mđrăm mbĭt mơ̆ng čar hlŏng kơ nah gŭ, Gia Lai hlăk dơ̆ng mtlaih leh lu klei gun kpăk kơ bruă bi liê ngăn prăk mơ̆ng knŭk kna. Ral Lan Chung – Khua knơ̆ng bruă sang čư̆ êa čar Gia Lai - mñă:

 “Gưl dlông hlăk mâo hdră čiăng mă bruă bi tŭ jing klei duh bi liê kluôm. Čar tă leh hdră mă bruă hŏng klei ƀhĭ ênŭm kơ klei anăn. Bi ksiêm dlăng wĭt, lehanăn iêo jak jih ai dưi, kñăm ruh mgaih bi ênŭm anôk dôk gun kpăk. Čiăng si srăng ngă djăp mta klei găl bi dưn yua jih, truh kơ klei mđrăm mbĭt hŏng bruă sang čư̆ êa mđĭ kyar bruă duh mkra, anei jing sa hlăm dŭm mta bruă yuôm bhăn”.