Kñăm mđĭ ktang hĭn bruă bi hgŭm ksiêm dlăng, hiu duah, bi kdơ̆ng, gang mkhư̆ leh anăn hmao msir mgaih dŭm klei ngă jhat kơ dliê kmrơ̆ng, tlam mbruê 28/10, ti ƀuôn prŏng Kon Tum, Knơ̆ng bruă sang čư̆ êa čar Kon Tum- Quảng Nam- Quảng Ngãi mkŏ mjing Klei bi kƀĭn ksiêm dlăng boh tŭ hlue ngă Hdră kčah bi hgŭm kriê dlăng răng mgang dliê bi knông mơ̆ng 3 čar. Hlue ngă Klei bhiăn bi hgŭm kriê dlăng răng mgang dliê krĭng bi knông mâo 3 čar bi siñê, êbeh 2 thŭn êgâo êpul ksiêm dlăng dliê 3 čar mkŏ mjing leh 1.200 gưl hiu ksiêm dlăng, duah phung ngă jhat kơ dliê kmrơ̆ng, thâo ƀuh ngă hră mơar ngă soh 98 klei.

Hồ Quang Bửu,  K’iăng Khua Knơ̆ng bruă sang čư̆ êa čar Quảng Nam bi mklă, hlăm wưng êgap dŭm êpul bruă djŏ tuôm 3 čar mâo leh klei bi hgŭm jăk hlăm bruă kriê dlăng răng mgang dliê krĭng bi knông. Hlăm klei bi kƀĭn, 3 čar bi siñê leh Klei bhiăn bi hgŭm răng mgang dliê krĭng bi knông hŏng dŭm boh phŭn klă klơ̆ng čiăng mđĭ răng mgang leh anăn mđĭ kyar dliê hlăm wưng kơ anăp.