Ti anôk bi kƀĭn trông, phung bi ala brei thâo, êngao kơ êa yua lehanăn êa krih, kwar Krah lehanăn Lăn dap kngư mâo truh 94 phŭn mkăp êa mkăn. Hluê si Kơiăng nai prŏng, nai prĭn Nguyễn Văn Lâm, Khua Êpul hgŭm bruă lăn ala, êa juôr Việt Nam, anei jing klei găl prŏng čiăng mđĭ kyar bruă duh mkra. Čiăng mđĭ lar klei găl anei, dŭm alŭ wăl brei hnưm čih mkra hdră čuăl mkă hnưm lehanăn jak iêu klei duh bi liê pŏk mlar hnơ̆ng bruă tuh tia.

Klei bi kƀĭn trông “Kriê dlăng, ba yua lehanăn mtrŭt mđĭ hdră duh bi liê mđĭ kyar bruă êa mguôp hŏng bruă lŏ hma, krĭng ƀuôn sang mrâo lehanăn bruă ngăn dŏ mtah krĭng kwar krah – Lăn dap kngư”, ăt pŏk klei găl mtrŭt mđĭ bruă duh bi liê, jak iêu djăp klei găl mâo hlăm hdră bi hgŭm knŭk kna – êngao knŭk kna PPP čiăng bi kjăp anôk bruă kơ êa jua, ruh mtlaih klei gun kpăk gun, mđing truh mta kñăm đĭ kyar hơĭt kjăp kơ kluôm krĭng./.