Hlăm 4 mlan akŏ thŭn, čar Dak Lak mkăp hră mơar kơ 10 hdră bruă mrâo bi liê hlăm dŭm mta bruă (hŏng ênoh prăk bi liê giăm 4.800 êklai prăk), hlăm anăn mâo 4 hdră bruă hlăm bruă mkra mjing mnơ̆ng lŏ hma- dliê kmrơ̆ng- kan hdang. Dŭm hdră bruă anei kƀĭn ktang hlăm bruă mkra mjing boh kroh leh anăn rông mnơ̆ng yua kdrăp mrâo. Dak Lak ăt mkŏ mjing lu hdră mđĭ kyar bi liê, hưn mdah klei găl mơ̆ng alŭ wăl kơ bruă lŏ hma, msĕ si mkra mjing kphê, durian, măk kă.

Hlue si Knơ̆ng bruă lŏ hma leh anăn wăl hdĭp mda čar Dak Lak, dŭm hdră bruă mâo čar mđing leh ƀuăn rơ̆ng yua tŭ dưn ngăn dŏ, mkiêt mkriêm pui kmlă, jăk kơ wăl hdĭp mda leh anăn mđĭ bruă duh mkra kluôm, mđĭ ênoh yuôm mnơ̆ng dhơ̆ng lŏ hma alŭ wăl. Mbĭt anăn mđĭ ênoh yuôm mnơ̆ng dhơ̆ng lŏ hma jing sa hlăm dŭm hdră tă kơ Dak Lak mjing hnơ̆ng kčah đĭ kyar hlăm wưng kơ anăp.