Ênao Ia Lâm, ƀuôn hgŭm Gào jing sa hlăm dŭm knơ̆ng mkăp êa kơ mnơ̆n gmnuih ƀuôn sang pla mjing, ƀiădah ară anei khuôt leh jih truh kđang tur êa. Čiăng lŏ duah êa kơ mnơ̆ng pla mjing, êjai găn mđiă ktang bhang hlơr, lu gŏ sang mnuih ƀuôn sang nao mưn êdeh kuai, êdeh čuk čiăng kuai êa bi êlan hĭn hlăm krah tur ênao čhĭndah lŏ mâo êa hram. Ƀiădah hnơ̆ng êa ƀiă đei, ăt bhiâo riâo rit jih mơh. Nguyễn Phát, ti ƀuôn O Grang, ƀuôn hgŭm Gào, bi êdah hŏng klei ênguôt:

“Ară anei dôk guôn êa hram mâo kdơ̆ng krih hĕ ƀiă mơ̆ng 5,7 phŭn, bi mmiă êa krih yơh čiăng dŏng mgang kơ kphê pô. Êa jua thŭn anei pral hĭn khuôt”.

Amâo mâo djŏ knŏng hjăn ênao Ia Lâm, ƀiădah jih wăt 5 boh knơ̆ng kdơ̆ng êa ti ƀuôn hgŭm Gào êa khuôt truh ti tur leh sơăi. Bùi Văn Thỏa mbĭt hŏng lu gŏ sang mkăn, hlăm dôk bi pom êa mơ̆ng ênao Ku Tong brei thâo, mnuih ƀuôn sang hlăk dôk pom dŭm ênoh êa hram adôk ƀiă dhiă. Tui si Thỏa, tơdah adiê ăt dôk không nanao, knŏng hlăm sa wưng bhiâo đuič, ênao êa hlŏng jih khuôt:

“Mnuih ƀuôn sang ară anei dôk bi hnĭng, kyua amâo lŏ djăp êa krih, dleh dlan êdi. Mâo đa gŏ sang kyua êa ktir, ƀiădah aê ăt khuôt mơh.”

 Klei kƀah êa kơ mnơ̆ng pla ară anei ti Gia Lai hlăk dôk lar truh ti alŭ wăl nah yŭ čar. Rơ Mah Hêng, K’iăng khua knơ̆ng bruă sang čư̆ êa să Ia Tôr brei thâo, êlâo hĭn alŭ wăl hâo hưn, mtrŭt mjhar mnuih ƀuôn sang ba yua hdră krih êa hŏng klei mkiêt mkriêm, čiăng dưi krơ̆ng mnơ̆ng pla mjing:

“Dah mđiă hlơr ktang msĕ si ară anei nanao, sĭt nik srăng kƀah êa, kyuadah êa mâo ară anei jing knŏng êa kbăng lehanăn êa hnoh, amâo mâo knơ̆ng kdơ̆ng êa prŏng ôh. Hmei lŏ mtrŭt mjhar mnuih ƀuôn sang ba yua hdră krih êa hŏng klei mkiêt mriêm, rơ̆ng čiăng bi mâo djăp êa kơ mnơ̆ng pla mjing.”

Boh sĭt brei ƀuh, klei kƀah êa krih kơ mnơ̆ng pla mjing ară anei ti Gia Lai jing klei bhiăn leh hlăm grăp blư̆ yang bhang truh, boh nik hŏng dŭm alŭ wăl nah yŭ čar. Leh mâo bi mŭt mbĭt, Phung khua kiă kriê bruă Đảng čar Gia Lai mtă brei lŏ kơrŭ wĭt bruă knơ̆ng mbông êa, hŏng ênoh bi liê jih jang hlăm brô 17 êbâo êklai prăk, hlăm wưng thŭn 2025-2030. Bi êjai ară anei, dŭm boh ƀuôn hgŭm iêo jăk leh jih klei găl pô.  Nguyễn Văn Phương, Adŭ bruă duh mkra ƀuôn hgŭm Gào brei thâo:

“Ƀuôn hgŭm ăt akâo leh hŏng čar đru prăk pioh lŏ mkra wĭt dŭm boh ênao mgơ̆ng êa hlăm alŭ wăl. Kyuanăn pô srăng nao hwai bi mdoh mnuôr mbông êa, hlăm tur ênao êa čiăng bi mâo êa krih djăp kơ mnơ̆ng pla mjing hlăm alŭ wăl. Kơ êdei anăp srăng ksiêm dlăng dŭm hnoh êa, pioh rŭ mkra knơ̆ng kdơ̆ng êa pioh mjin ghnơ̆ng êa mur kơ dŭm krĭng krih điêt hlăm ƀuôn hgŭm.”