Mơ̆ng knhal jih mlan 3/2026 truh kơ ară anei, adiê hlơr mđiă ktang ngă leh êbeh 757 ha mdiê yan puih mnga ti dŭm să Hòa Thịnh, Hòa Mỹ, Tây Hòa lehanăn Phú Hòa 2 kƀah êa. Thŭn êlâo, adiê hjan êa lip ngă bi rai leh mbông mnuôr mkăp êa kyua anăn yan buh mnga mjeh mdiê Puih mnga 2025-2026 hnui 1 mlan mkă hŏng grăp thŭn, ngă kơ mdiê hlăk ƀlĕ dôk kƀah êa kjham.

Čiăng mdrơ̆ng hŏng klei anei, 10 hruê êgao, Anôk bruă TNHH Một thành viên mbông mnuôr êa Đồng Cam mkŏ mjing leh 7 anôk pom êa. Mbĭt hŏng anôk pom dôk sa anôk, kdrăp hiu pom êa ăt dưi ba yua. Phŭn mkăp êa dưi ba yua tuič hnơ̆ng čiăng pom êa mŭt hlăm dŭm mbông mnuôr. Nguyễn Văn Nhành, Kơiăng khua Anôk bruă mbông mnuôr êa Đồng Cam brei thâo:

“Hŏng ênhă kƀah êa êbeh 700 ha ti hdră mbông mnuôr êa nah Dhŭng snăn hdră msir tal êlâo hĭn jing pom êa bi hmăr čiăng đăm hmăi truh kơ hnơ̆ng mâo boh mnga. Mơ̆ng ară anei truh kơ knhal jih mlan 4 adiê srăng mđiă hlơr ktang kyua anăn hlăm hruê kăm anei lehanăn hruê kăm êdei jing wưng dleh dlan êdi, anôk bruă ăt rơ̆ng pom êa nanao, leh kơnăn srăng bi hrŏ ƀrư̆ ƀrư̆”.

Čiăng kơ bruă mkăp êa hluê ngă tŭ dưn, dŭm êpul bruă lŏ hma srăng dôk gak jih hruê mlam, čiăng ba yua kdrăp pom êa mdrơ̆ng hŏng klei kƀah êa, mbĭt anăn bi hgŭm hŏng êpul bruă lŏ hma ti alŭ wăl čiăng mkăp êa hŏng hdră djŏ guôp, mơ̆ng kbưi truh kơ giăm; bi hrŏ klei ƀĭng ngă lŏ hma dôk čang êa, čŏng nao pom mă pô. Đặng Quốc Hoàn êpul bruă lŏ hma krĭng Hòa Đồng, Hòa Mỹ brei thâo:

"Mdrơ̆ng hŏng klei kƀah êa snăn ayŏng adei dôk gak răng 100% čiăng kơ maĭ êran jih hruê mlam dưi ba êa truh kơ lŏ, krĭng kbưi hlăk dôk kƀah êa kjham”.

Klei kƀah êa hlăk dôk mâo kjham ti krĭng čư̆ čhiăng nah Ngŏ čar Dak Lak, hlăk mâo lu ênao êa khuôt jih. Giăm 1 mlan êgao, 5 hruê dŭm gŏ sang ti alŭ Hoà Sơn, să Sơn Hòa lŏ nao ti lŏ bi êran maĭ pom, pom êa mơ̆ng kbăng êa ktir ba kơ mdiê. Hluê mnuih ƀuôn sang, êa hlăm ênao amâo lŏ dôk, knŏng ktir êa kbăng đuič dưi dŏng hdĭp mdiê khădah thâo klei anei ba lu klei luič liê.

 “Pom sa blư̆ leh, ară anei lŏ pom tal dua, huĭdah kƀah êa amâo mâo mdiê huă ôh”.

Ti anăp klei adiê không mđiă ktang msĕ ară anei, Knơ̆ng bruă Lŏ hma wăl hdĭp mda čar Dak Lak mtă kơ dŭm anôk bruă, êpul êya ksiêm dlăng, tĭng dlăng phŭn mkăp êa ti dŭm hdră mbông mnuôr êa ăt msĕ mơh pŏk hdră kčah ba yua phŭn mkăp êa tŭ dưn, djŏ guôp, rơ̆ng hŏng klei dôk čiăng mơ̆ng grăp krĭng, boh nik ti krĭng dôk kƀah êa kjham, huĭ srăng kƀah êa kjham, mbĭt anăn mâo hdră pla mjing djŏ tuôm, rơ̆ng bi hrŏ klei luič liê kyua adiê không mđiă hlơr ngă./.