Ti anôk drông, Khua knŭk kna mñă Đảng, Knŭk kna lehanăn mnuih ƀuôn sang Việt Nam bi myuôm nanao, čang hmăng amâo mâo mdei dưi lŏ ksŭl mbŭ, lehanăn hyuă kjăp hĭn klei bi hgŭm mâo leh mơ̆ng đưm Việt Nam – Dưr Korea đĭ kyar jăk, tŭ dưn.

Khua knŭk kna čang hmăng kơ dua nah lŏ bi hgŭm kjăp hĭn, hlue ngă tŭ jing jih jang klei leh bi tŭ ư hlăm dŭm klei phung khua prŏng dua ala čar bi čuă čhưn, krơ̆ng nanao boh tŭ mơ̆ng klei bhiăn bi hgŭm bruă duh mkra, bruă kreh knhâo, mbĭt anăn dua nah lŏ mđĭ hĭng klei bi hgŭm bruă lŏ hma, dhar kreh, mjuăt asei mlei, bruă hiu čhưn ênguê, bruă sang hră mơar lehanăn bruă mdrao mgŭn. Mơ̆ng anăn đru bi kjăp hĭn klei thâo bi mguôp, lehanăn pŏk mlar klei hgŭm dua nah hlăm wưng mrâo./.