Čar Daklak (leh klei bi mŭt mbĭt hŏng čar Phú Yên) mâo ênhă êbeh 18.000 km², ênoh mnuih êbeh 3,34 êklăk čô mnuih, pŏk mlar kơ klei mđĭ kyar mrâo hŏng bruă klam mkŏ krĭng lăn dap kngư kơ ktuê hang ksĭ dhŭng kwar krah. Bruă lŏ bi mlih klei čuăl mkă Daklak wưng thŭn 2021–2030, tă hdră mă bruă truh thŭn 2050 mâo čoh čuăn tă wĭt kơ klei dưi duh mkra, kơ anôk ala bruă kđi čar hlăm alŭ wăl, lehanăn dưn yua jih klei tŭ dưn hlăm dŭm klei găl mkă krĭng, ñu kmă hŏng ala tač êngao. Dŭm mta kñăm, hdră êlan mđĭ kyar mâo ksiêm dlăng hlue hŏng hdră êlan sa hnơ̆ng, bi kna plah wah dŭm dhar bruă, anôk bruă lehanăn alŭ wăl, bi djŏ guôp hŏng klei dưi sĭt, anăp truh kơ mta kñăm đĭ kyar mơ̆ng 11–11,5% wưng thŭn 2026–2030. Tui si k’iăng nai prŏng, nai prĭn Lê Xuân Bá, Khua anôk bruă ksiêm duah bruă kiă kriê klei duh mkra gưl dlông êlâo dih lač, klei mđĭ kyar bruă tuh tia brei yap jing tal êlâo hlăm klei bi mlih hdra êlan čuăl mkă mơ̆ng čar:

“Čuăl mkă klei mđĭ kyar bruă duh mkra mơ̆ng čar Daklak klă sĭt ka mâo klei mđĭng djŏ hnơ̆ng ôh. Năng ai hlăm wưng leh êgao, lehanăn hlăm 2 – 3 thŭn tinăp anei Daklak dleh dưi mâo klei đĭ kyar bruă tuh tia djŏ tui si klei čiăng, anei jing klei sĭt, ƀiădah anei jing klei čuăl mkă mơ̆ng wưng thŭn 2021 – 2030 lehanăn tă hdră truh kơ thŭn 2050, snăn Daklak brei mdưm boh phŭn kơ klei mđĭ kyar bruă tuh tia. Kyuadah čiăng mâo klei mdrŏng sah, snăn bi čuăl mkă hdră mđĭ kyar bruă tuh tia ti hnơ̆ng djŏ guôp.”

Đru mguôp kơ klei čuăl mkă mơ̆ng čar Daklak, lu phung thơ̆ng kơ bruă, phung ngă bruă kiă kriê, lehanăn phung duh mkra ăt bi lač, klei čuăl mkă brei bi mngač hĭn klei bi mguôp anôk, nah gŭ, lehanăn hnơ̆ng klei dưi kơ klei mđĭ kyar plah wah lăn dap kngư hŏng ktue hang ksĭ dhŭng kwar krah. Lehanăn mâo klei bi mkŏ krĭng  hlue hŏng êlan dơ̆ng mâo mkra mđĭ, mâo logistics, kdŭn ksĭ, mbah kbiă hŏng ala tač êngao, lehanăn bruă hiu čhưn ênguê nao mđrĭng hŏng klei kriê pioh dhar kreh alŭ wăl. K’iăng nai prŏng, nai prĭn Nguyễn Thị Phương Trâm, Khua anôk bruă ksiêm duah kơ dhar kreh Việt Nam, bi êdah kơ hdră êlan Daklak mkŏ mjing bruă mđĭ kyar hiu čhưn ênguê tui si atur knơ̆ng mơ̆ng bruă kriê pioh lehanăn mđĭ bi lar dhar kreh alŭ wăl:

  “Hlăm klei čuăl mkă lehanăn bi mlih hdră čuăl mkă, brei drei mđing hĭn kơ alŭ wăl dhar kreh dŭm djuê ana. Anei jing sa klei yuôm bhăn êdi, mjing knơ̆ng kơ klei tŭ bruă dhar kreh čar Daklak, lehanăn hlăm lăn dap kngư. Grăp mta klei tŭ dưn, dŭm klei hing ang kơ dhar kreh djuê ana jing sa anôk kơ dhar kreh hjăn, pioh kơ yang ƀuôn hgĭp, mjut mjign rông ba klei mđĭ kyar dhar kreh anăn pioh đĭ lar, lehanăn kriê pioh.”

Lŏ tŭ mă dŭm klei đru mguôp jih ai tiê, mâo klei tŭ mơ̆ng phung kreh knhâo, phung truăn kơ bruă, phung duh mkra ti anôk trông čhai, phung khua kiă kriê čar Daklak brei thâo srăng lŏ dơ̆ng ksiêm dlăng jih kơ dŭm klei găl, klei dưi, lehanăn wăt klei dleh kƀah, čiăng lŏ bi kjăp hĭn hdră êlan kơ klei mđĭ kyar bi djŏ leh klei bi mŭt mbĭt. Daklak yap bruă čuăl mkă brei ngă hŏng klei mdjĕ, bi sa hnơ̆ng mbĭt, rơ̆ng dưi dưn yua jih klei găl hlăm klei mđĭ kyar, hyua kjăp hĭng klei bi mguôp krĭng, dưn yua tŭ jing ai dưi mđĭ kyar.

Tui si Đỗ Hữu Huy, Khua knơ̆ng bruă sang čư̆ êa čar Daklak, bruă bi mlih klei čuăl mkă srăng pral dưi ba mdah kơ Êpul gơ̆ng bruă ƀuôn sang čar ksiêm dlăng, bi mklă hlăm wưng tinăp:

 “Knơ̆ng bruă sang čư̆ êa čar mtă leh kơ dŭm knơ̆ng dhar bruă, alŭ wăl, anôk bruă djŏ tuôm lehanăn klei bi hgŭm dŭm êpul êya mđing kčĕ kơ ai dưi ngă bruă, hrui mă djăp ênŭm dŭm klei kăp kčĕ mơ̆ng phung bi ala, čiăng rơ̆ng leh hră mơar kơ klei čuăl mkă djăp ênoh čuăn. Mbĭt anăn, čar ăt čang hmăng srăng lŏ dơ̆ng tŭ mă nanao klei kăp kčĕ mơ̆ng phung truăn kơ bruă, phung kreh knhâo, phung khua kiă kriê čar êlâo dih hlăm wưng anăp anei.”./.