Dŭm hruê giăm anei, mnuih ƀuôn sang ti Dak Lak rŭng răng kơ lu klei ngă jhat hlăm sang hră plah wah phung hđeh sang hră. Dŭm videô clip mdar lu mnuih čăm sa čô, ngă jhat kơ ƀĭng găp mđung hlăm hla pŏk web ala ƀuôn amâo djŏ knŏng ngă kơ mnuih ƀuôn sang đĭ ai ngêñ ôh ƀiădah jing klei hưn brei răng kơ klei bi blŭ hrăm hlăm sang hră, brei ƀuh klei bi hgŭm plah wah gŏ sang - sang hră ka kjăp.

Lưu Tiến Quang, K’iăng Khua Knơ̆ng bruă sang hră mtô bi hriăm Dak Lak brei thâo, dhar bruă pŏk ngă leh lu hdră msir kñăm mđĭ klei gang mkhư̆ mơ̆ng kbưi, mơ̆ng hnưm. Dŭm hră mơar gĭt gai, dŭm hdră msir gang mkhư̆ klei ngă jhat hlăm sang hră dưi ba mdah nanao hlăm jih thŭn hriăm. Gang mkhư̆ klei ngă jhat hlăm sang hră brei ngă mơ̆ng phŭn: mkŏ mjing sa sang hră êđăp ênang, jăk mơak leh anăn phung hđeh dưi mđing hmư̆, dưi bi đru, dưi hmao kriê dlăng ai tiê klei mĭn.