Hlăm mmông mjĕ mjuk, klei yăl dliê mơ̆ng lĭng kahan hđăp Sùng A Dê, mnuih djuê ana Mông ti să Văn Chấn, čar Lào Cai ngă kơ lu mnuih mgei ai tiê kyua hdră ñu đru kơ mnuih ƀuôn sang tlaih ƀuhn ti krĭng lăn sah kbah, klưh hroh kluôm thŭn. Kbiă kahan mơ̆ng Sư đoàn 316 (Kahan alŭ wăl 2) thŭn 2010, leh sa wưng ksiêm hriăm, ñu jhŏng ba yua mjeh kram Bát Độ wĭt lông pla ti ênhă 15ha. Leh 2 thŭn, êbŭng hlăk hlê mâo, mkŏ mjing hnư hrui wĭt hơĭt, đru krơ̆ng kơ lăn, bi hrŏ klei klưh hroh ti ping čư̆. Mơ̆ng gru hmô tal êlâo, truh kơ ară anei ênhă kram Bát Độ ti alŭ wăl mâo leh dŭm pluh čô lĭng kahan hđăp nao hgŭm hluê ngă, leh anăn bi kƀĭn jing Êpul bi mguôp pla kram Bát Độ, mkŏ klei mkra mjing hŏn dŭm sang mă hlăm čar. Lĭng kahan hđăp Sùng A Dê mâo Khua Knŭk kna čih yap leh anăn mđup brei klei pah mni kyua mâo boh tŭ dưn êdah êdi hlăm bruă hluê ngă gru mngač Hồ Chí Minh.

 “Mơ̆ng thŭn 2021 truh ară anei, hmei mđĭ kyar mâo 50ha. Hmei bi mguôp hŏng dŭm knơ̆ng bruă ti čar Lào Cai, bi tŭ ư ba čhĭ hlăm wưng sui, mâo mnơ̆ng dhơ̆ng arăng srăng blei jih”.

Bi ti ƀuôn hgŭm Bắc Nha Trang, čar Khánh Hòa, lĭng kahan hđăp Nguyễn Văn Dũng (kkiêng thŭn 1966), kahan êka 2/4, lŏ ngă kơ lu mnuih mgei ai tiê kyua klei khăp dĭng kna. Tuôm ngă bruă ti Lữ đoàn 146, krĭng 4 kahan êa, mâo mmông ngă bruă klam sui ti plao ksĭ Gạc Ma, êka 61%, ƀiădah ñu ăt mbĭt hŏng ƀĭng hgŭm jêñ jêñ nao čuă êmuh dŭm gŏ sang lĭng kahan êka, phung djiê êngiă, bi hdơr kơ phung lĭng kahan êngiă asei hlăm dŭm wưng bi hdơr, hruê 27/7 amâođah wưng tết. Mơ̆ng hruê kbiă kahan, ñu mbĭt hŏng phung lĭng kahan hđăp ti alŭ wăl ngă hdră Đru adei nao sang hră, đru rông ba lu phung hđeh sang hră êrĭt amĭ ama, mâo klei hdĭp dleh dlan mơ̆ng gưl 1 truh kơ gưl 3. Lu phung hđeh mâo klei kơup mgang anăn mâo klei găl lŏ nao sang hră, mâo klei găl bi mlih klei hdĭp. Lĭng kahan hđăp Nguyễn Văn Dũng yăl dliê:

 “Awa Hồ tuôm lač “Kahan êa êwiên ƀiădah amâo mâo êwu ôh”. Ba hlăm pô knhuah hdĭp lĭng kahan Awa Hồ kâo dlăng anăn jing klei mjuăt hlăm klei mĭn, kgŭ dơ̆ng bi mdrŏng kơ gŏ sang leh anăn tŭ dưn kơ yang ƀuôn leh anăn đru bi gui klei dleh dlan. Kyuanăn hlăm klei pô dưi ngă pô srăng đru”.

Hluê ngă asăp mtrŭn mrô 05/2016 mơ̆ng Phŭn bruă kđi čar kơ mtrŭt mđĭ bruă hluê ngă gru mngač Hồ Chí Minh, hlăm 10 thŭn êgao, dŭm gưl bruă leh anăn phung hgŭm lĭng kahan hđăp ngă leh lu hdră bruă, gru hmô êdah êdi msĕ si: lĭng kahan hđăp bi đru hdơ̆ng pô mđĭ kyar bruă duh mkra”, “5+1”, “2 lăm, 3 đru”. dŭm gru hmô VAC, VACR,  đang war…Mơ̆ng anăn đru kơ lu phung hgŭm gĭr ktưn tlaih ƀun.

Ăt mơ̆ng thŭn 2016 truh kơ ară anei, dŭm gưl êpul bruă rŭ mdơ̆ng leh 23.000 boh sang bi hgŭm, đru msir lăm êbeh 43.000 sang dôk êjai kơ phung hgŭm dleh dlan. Êpul lĭng kahan hđăp lŏ myơr dŭm êklăk m2 lăn čiăng mkra êlan krĭng ƀuô sang mrâo. Hluê anăn bi lar bruă hluê ngă gru mngač Awa mơ̆ng nah gŭ. Trung tướng Khuất Việt Dũng- kiăng khua êpul hgŭm lĭng kahan hđăp Việt Nam brei thâo: bruă hluê ngă gru mngač Awa srăng mâo êpul bruă lĭng kahan hđăp Việt Nam mlih mrâo hlăm wưng kơ anăp:

Hluê ngă gru mngač Awa srăng nao mbĭt hŏng hdră bi lông ktưn Lĭng kahan hđăp bi hmô, lĭng kahan hđăp bi đru hdơ̆ng pô tlaih ƀun, thâo ngă bruă duh mkra, dŭm klei mtrŭt mjhar mơ̆ng gưl dlông leh anăn alŭ wăl. Hmei dlăng bruă hluê ngă tŭ dưn dum bruă klam kđi čar jing bruă klă klơ̆ng hĭn čiăng hluê ngă gru mngač Awa. Bruă hmao ƀuh leh anăn pŏk mlar dŭm gru hmô, klei êdah êdi yuôm bhăn. Anăp anei hmei ăt srăng mlih mrâo dŭm hdră čiăng kơ bruă anei lu jơr hĭn leh anăn mâo ai lar bra jăk hĭn.

Hlăm mmông mjĕ mjuk, Êpul lĭng kahan hđăp Việt Nam mđup brei leh hră pah mni kơ dŭm êpul bruă, grăp čô mâo boh tŭ dưn êdah êdi hlăm bruă hluê ngă gru mngač Hồ Chí Minh wưng thŭn 2016 - 2026.