Tlam hruê 24/5, ti Anôk bruă Knŭk kna, Êpul hgŭm đru kčĕ bruă phưi mnă êlâo kơ wưng kčah bi kƀĭn, bi mklă leh hră mơar akâo kơ Khua lăn čar phưi êlâo kơ wưng kčah hŏng phung mnă mâo djăp klei găl djŏ hŏng wưng bi hdơr 51 thŭn Hruê mtlaih êngiê kwar Dhŭng, hluh lir lăn čar (30/4/2026), kkuh mơak tŭ jing Klei kƀĭn phung bi ala kluôm ala čar tal XIV mơ̆ng Đảng, ruah phung bi ala Anôk bruă kƀĭn ala gưl XVI lehanăn ruah phung bi ala Êpul gơ̆ng bruă ƀuôn sang dŭm gưl, wưng thŭn 2026-2031.

Blŭ hrăm ti anôk bi kƀĭn, Kơiăng khua knŭk kna Phạm Gia Túc lač klă, klei thâo pap hŏng mnuih tuôm ngă soh jing knhuah bhiăn jăk siam mŏng djuê ana drei. Êpul hgŭm đru kčĕ bruă phưi mnă êlâo kơ wưng kčah thŭn 2026 bi mklă leh êbeh 10.000 mta hră mơar mâo djăp klei găl dưi phưi. Kơiăng khua knŭk kna Phạm Gia Túc mtă hlăm hdră ksiêm dlăng brei rơ̆ng hluê ngă djŏ hdră bhiăn. Hluê si Êpul hgŭm đru kčĕ bruă phưi mnă êlâo kơ wưng kčah, čiăng kơ hdră phưi mnă êlâo wưng kčah thŭn 2026 dưi mâo boh tŭ, dŭm gưl, dhar bruă, alŭ wăl, brei mđing kơ hdră ñŭ kma hŏng êpul êya kơ mnuih wĭt mnă, mđing mtô mblang, mđĭ klei thâo săng, klei đua klam mơ̆ng bruă Đảng, bruă knŭk kna alŭ wăl, dŭm êpul kđi čar – ala ƀuôn, êpul êya lehanăn mnuih ƀuôn sang, hgŭm kngan đru kơ mnuih wĭt mnă lui klei hêñ, klei soh pô tuôm ngă leh./.