Hlăm 2 hruê, 3-4/11, ti ƀuôn prŏng Ƀuôn Ama Thuôt, čar Dak Lak, Knơ̆ng bruă răng mgang mnơ̆ng pla mjing, Phŭn bruă Lŏ hma mđĭ kyar krĭng ƀuôn sang mkŏ mjing Klei kƀĭn trông lehanăn mjuăt bi hriăm “Mđĭ hdră ksiêm dăng bruă čhĭ, ba yua êa drao răng mgang mnơ̆ng pla mjing ti Lăn dap kngư” mâo pô bi ala phung khua kiă kriê, knuă druh knơ̆ng bruă răng mgang mnơ̆ng pla mjing 5 čar krĭng lăn dap kngư nao hgŭm. Hluê klei hưn ti knăm anei, Lăn dap kngư mâo hlăm brô 3.400 anôk čhĭ êa drao răng mgang mnơ̆ng pla mjing.

Hdră kriê dlăng êa drao răng mgang mnơ̆ng pla mjing ti Lăn dap kngư dưi bi mklă ka kjăp, bruă gang mkhư̆ klei čhĭ, dŭ mdoăng, ba yua êa drao răng mgang mnơ̆ng pla mjing soh hdră bhiăn, mnơ̆ng mgưt ti alŭ wăl dôk dleh dlan. Ti knăm anei, phung bi ala lač, čiăng mđĭ boh tŭ kriê dlăng bruă anei, brei mđĭ klei bi hgŭm mơ̆ng anôk bruă djŏ tuôm, mđĭ hdră mtô mblang, mjuăt bi hriăm kơ ƀĭng ngă lŏ hma amâo blei, yua êa drao răng mgang mnơ̆ng pla mjing dôk kăm, lehanăn ktrâo lač hdră ba yua tŭ dưn êđăp ênang./.