Mơ̆ng hlăk dôk điêt, A Thu khăp leh êdi kơ ênai kdrăp pĕ tông djuê ana. Ñu nao hlăm dŭm knăm mơak mơ̆ng ƀuôn leh anăn hriăm yua, hriăm pĕ tông. Sa hlăm dŭm klei đru mguôp êdah êdi mơ̆ng A Thu jing bruă tui duah, mkra mjing leh anăn rang mdah đĭng boh tâo, sa hlăm dŭm kdrăp pĕ tông đưm hĭn mơ̆ng Lăn Dap Kngư. Ñu mâo leh lu thŭn ksiêm duah, duah boh tâo mâo ênoh siam čiăng mkra đĭng boh tâo. Amâo mdei knŏng bruă anăn, A Thu lŏ mâo klei mbruă, bi mguôp đĭng boh tâo hŏng dŭm kdrăp pĕ tông mkăn mjing dŭm ênai ênhiang jăk, iêo jak klei mđing uêñ mơ̆ng lu phung khăp kơ ênhiang mmuñ. Ñu brei thâo:

“Kâo nao djăp anôk, kâo ƀuh diñu mkra mjing, tông čing leh anăn kdŏ čhuang. Kâo ƀuh diñu mkra thâo êdu, mơ̆ng anăn kâo hriăm leh anăn ƀrư̆ ƀrư̆ jak mnuih ƀuôn sang hriăm tông čing, đĭng boh tâo, brô̆ Klông Put, T’rưng…hlăm klei mĭn kâo mĭn nanao, arăng dưi ngă pô ăt dưi ngă, kâo čŏng  pô gĭr leh anăn dưi jak mnuih ƀuôn sang.

Thâo săng kơ klei yuôm mơ̆ng bruă kriê pioh dhar kreh, pô thâo mbruă A Thu pioh leh lu mmông leh anăn ai tiê čiăng lŏ mtô kơ phung mda asei. Amâo djŏ knŏng mtô kơ hdră pĕ tông ƀiădah lŏ kah mbha dŭm klei yăl dliê, boh tŭ yuôm hlăm grăp ênhiang. Kyuanăn, lu phung êdam ngiêk hlăm ƀuôn dưi thâo leh anăn lŏ čuê knhuah gru, bi lu jơr dhar kreh Sedang. Pô thâo mbruă A Thu hơ̆k mơak brei thâo:

“Phung hđeh nao hriăm ƀuh klei hơ̆k mơak êjai kâo nao atăt diñu bi lông ti kdriêk, ti čar, diñu lač hơ̆k mơak sơnăk, dưi nao bi lông bi êdah klei khăp pô hŏng čing čhar, dưi bi tuôm leh anăn hriăm lu. Grăp blư̆ mâo nao bi lông, kâo atăt diñu bi nao diñu hơ̆k mơak êdi”.

Ti alŭ Đăk Rô Gia, ñu mkŏ mjing leh sa êpul tông čing, kdŏ čhuang hŏng 30 čô, jêñ jêñ nao hgŭm hlăm dŭm hdră dhar kreh prŏng hlăm leh anăn êngao čar. Êngao kơnăn, pô thâo mbruă A Thu lŏ mkra mjing leh anăn pĕ tông dŭm kdrăp mơ̆ng đrao kram msĕ si tĭng nĭng, klong put:

“Mơ̆ng hlăk dôk điêt kâo tiŏ diñu nao tông čing, hmư̆ ênai čing kâo ƀuh klei hơ̆k mơak êdi. Mơ̆ng anăn kâo gĭr hriăm hriăm lu hlăm phung thâo mbruă kơ klei tông čing. Truh kơ ară anei, kâo mtô kơ mnuih ƀuôn sang leh anăn phung hđeh sang hră ti dŭm sang hră hlăm kdriêk, hlăm să leh anăn hlăm ƀuôn. Ară anei, kâo mtô ti dŭm sang hră, sang hră dôk yang hruê gưl 2, dŭm ƀuôn hlăm să, dŭm să leh anăn kdriêk êngao. Kâo ƀuh klei hơ̆k mơak êjai ênai čing kwang, kyuanăn kâo mtô kơ phung nao hriăm, leh anăn čĭng čhar jing dhar kreh djuê ana pô, pô srăng djă pioh”.

Hŏng klei thâo leh anăn klei khăp čiăng, A Thu jêñ jêñ mâo arăng iêo jak nao hgŭm hlăm dŭm knăm mơak dhar kreh hlăm leh anăn êngao čar. Dŭm klei rang mdah mơ̆ng ñu bi mâo gru kruăk, đru hlăm bruă hưn mdah dhar kreh mnuih Sêdang truh hŏng grăp čô. Mâo ƀô̆ mta ñu hlăm dŭm hdră bruă amâo djŏ knŏng jing klei ktưn hưn mơ̆ng ƀuôn Đăk Rô Gia, kdriêk Đăk Tô, čar Kon Tum ƀiădah lŏ jing klei bi klă klei mbruă mơ̆ng knhuah gru djuê ana hlăm klei hdĭp mrâo mrang. Hŏng klei thâo, klei khăp leh anăn klei duh myơr amâo mâo thâo êmăn, A Thu mâo knŭk kna mđup brei anăn knăl pô thâo mbruă êdah êdi.

“Mơ̆ng hlăk kâo mtô kơ mnuih ƀuôn sang tông čing, ară anei knŭk kna tŭ yap kâo jing pô mbruă êdah êdi mơ̆ng thŭn 2019. Mơ̆ng anăn truh kơ ară anei kâo mtô kơ phung nao hriăm. Lač sĭt mâo mă lu hră tŭ yap kyua klei ai đru mtô klei tông čing kơ mnuih ƀuôn sang leh anăn phung hriăm”.

Hlăm 5 thŭn êgao, pô thâo mbruă A Thu mtô tông čing kơ 25 adŭ hriăm hŏng giăm 300 čô hriăm dŭm sang hră leh anăn êpul êya ti dŭm kdriêk Đăk Tô, Sa Thầy, Đăk Glei, Tu Mơ Rông. Mbĭt anăn mtô kơ 8 čô thâo mbruă hlăm kdriêk kơ bruă mkra mlih leh anăn hmư̆ ênai čing. Ñu dôk mĭn, si ngă srăng ngă čiăng đru, kah mbha klei thâo, klei hriăm, đru mkŏ mjing êpul êya thâo bi mguôp leh anăn đĭ kyar.

“Msĕ kâo ƀuh ară anei ƀrư̆ hruê ƀrư̆ đĭ kyar. Mĭn tĭng hlăm êdei anăp kâo srăng gĭr lu hĭn čiăng djă pioh dhar kreh, knhuah gru djuê ana pô. Hlăm ai dưi pô, pô thâo pô srăng mtô leh anăn atăt mnuih ƀuôn sang leh anăn phung hruăm kdrăp pĕ tông djuê ana pô”.

Pô thâo mbruă A Thu jing pô bi êdah kơ ai tiê kriê pioh leh anăn bi lar knhuah gru ti Kon Tum. Dŭm klei đru mguôp mơ̆ng ñu amâo djŏ knŏng kriê pioh  knhuah gru djuê ana Sêdang ƀiădah lŏ bi mbŏ hlăm sang hjiê dhar kreh mơ̆ng dŭm djuê ana ti Việt Nam.