Jih mlan êgao, hlăm dŭm mmăt knhal jih hruê kăm, phung hlăm dua êpul tông čing prŏng leh anăn điêt ti ƀuôn Njang Bơ, să Trường Xuân, kdriêk Dak Song lŏ bi kƀĭn ti sang êpul êya hrăm mbĭt hriăm ti gŭ klei gĭt gai mơ̆ng pô mbruă. Dŭm klei tông čing djuê ana msĕ si čing Ngăn, Pích Tơ Trơ amâodah Trút Tru… kwang nanao. Ai tiê grăp čô mnuih dưi bi hrăp leh klei mdah mơ̆ng êpul mâo lu mnuih ƀuôn sang khăo hlăm klei rang mdah hruê 30-4, mphŭn pŏk klei dhar kreh - kdŏ mmuñ čar Dak Nông, kkuh drông 50 thŭn mtlaih êngiê kluôm kwar Dhŭng, hluh lir lăn čar. Amai H’Hiệp, sa čô hlăm êpul tông čing khua thŭn, brei thâo:

 “Hmei srăng lŏ dơ̆ng djă pioh, amâo djŏ knŏng rang mdah hlăm ƀuôn sang ôh, ƀiădah mđing kơ klei hiu čhưn ênguê êpul êya, čiăng kơ ênai čing Mnông kwang nanao ti krah liă lia.”

Ƀuôn Njang Bơ, să Trường Xuân, kdriêk Dak Song jing sa hlăm ênoh ƀiă ƀuôn ti čar Dak Nông ară anei mđĭ lar jih dua êpul tông čing mâo êpul phung khua thŭn leh anăn mda asei. Hlăm anăn êpul mda asei, mâo Y Huyền, 14 thŭn, hđeh sang hră adŭ 8 sang hră gưl 2 knŭk kna rông ba kdriêk Dak Song.

Y Huyền brei thâo, leh thâo ƀuôn mkŏ mjing êpul tông čing, kâo akâo kơ amĭ ama leh anăn nai čiăng dưi hriăm. Wăt tơdah mơ̆ng sang hră wĭt ti sang kbưi êbeh 30 km, kâo ăt gĭr grăp hruê kăm čiăng dưi hriăm tông čing, khăp kơ klei tông čing đưm mơ̆ng phung mbruă.

 “Hriăm tông čing tal êlâo brei mâo klei khăp leh anăn thâo mđing hmư̆ ênhiang čing. Hlăk mrâo hriăm, kngan ruă kyua čing khăng, pô tông hŏng kngan . ƀiădah ară anei kâo mưng leh, amâo lŏ ruă ôh.”

Dak Nông mâo 670.000 čô, hlăm 40 djuê ana. Hŏng dŭm djuê ana tinăn mtam msĕ si M'Nông, Êđê, Mạ… čing čhar jing mngăt dhar kreh. Hlăk đưm, čing jing kban mkŏ mnuih ƀuôn sang mjĕ hŏng Yang. Ară anei čing jing klei mkŏ bi hgŭm dŭm djuê ana. Ayŏng Lang Văn Quy, djuê ana Thái, mă bruă ti Dak Nông êbeh 10 thŭn anei, jing sa čô hlăm êpul tông čing prŏng ti ƀuôn Njang Bơ, să Trường Xuân, kdriêk Dak Song, brei thâo:

 “Kâo jing mnuih Thái, hlue gŏ sang ngă bruă duh mkra mrâo ti Lăn Dap Kngư. Tơdah ƀuh dhar kreh dŭm djuê ana Lăn Dap Kngư, kâo khăp snăk leh anăn tui hlue phung mbruă čiăng hriăm, dleh hĭn hŏng kâo jing hmư̆ ênai čing, thâóăng kơ klei tông čing anăn čiăng thiăm hruê mmông kơ phung khua mduôn mtô. Truh ară anei kâo thâo leh 2-3 klei tông čing. Čang hmăng hlăm wưng kơ anăp, phung mbruă lŏ dơ̆ng mtô klei tông čing kơ lu phung mda asei hlăm ƀuôn.”

Pô mbruă Y N’Srơi jing mnuih pioh leh lu thŭb hŏng bruă mtô dŭm pluh adŭ tông čing kơ dŭm êtuh čô mda asei ti Dak Nông. Ñu brei thâo, čing mâo hlăm djăp bruă điêt prŏng hlăm ƀuôn sang. Mtô tông čing sui thŭn leh, ñu ƀuh phung mda asei khăp snăk. Mơ̆ng phung anăn, dhar kreh djuê ana Mnông ƀrư̆ mâo hlăm klei hdĭp mrâo mrang.

“Hŏng mnuih Mnông, čing yuôm bhăn snăk. Mơ̆ng knăm mơak prŏng hlăm ƀuôn, truh kơ klei bi kuôl ung mô̆, knăm huă êsei mrâo hlăm grăp boh sang amâo dưi kƀah ôh ênai čing. Kyua anăn čing čhar yuôm bhăn snăk leh anăn mâo hlăm klei hdĭp mnuih Mnông.”

 Ti krah Lăn dap Kngư, ênai čing ăt kwan nanao. Čing čhar mnuih Mnông, Lăn Dap Kngư, găn jih klei gun kpăk kơ klei blŭ, kwang nanao msĕ si asăp iêô mthưr êpul êya dŭm djuê ana hdĭp mda ti krĭng lăn anei, djă kngan wĭt kơ phŭn agah, răng kriê knhuah dhar kreh./.