Hlăm dŭm hrue akŏ thŭn mrâo anei, Alŭ wăl hiu čhưn ênguê dhar kreh yang ƀuôn Kŏ Tam, ƀuôn prŏng Ƀuôn Ama Thuôt, čar Daklak mơak mñai mjhĭt m’uăt tue hiu čhưn. Amai H’Drim Ayŭn, mnuih mă bruă alŭ wăl hiu čhưn ênguê anei lač:

“Ti sang krum dlông mâo mkŏ mjing klei kdŏ čhuang, mnăm kpiê čeh mơ̆ng hrue 1 tết truh hrue 5 tết. Hlăm djăp anôk mâo mkŏ mjing djăp mta bruă hlue knhuah dhar kreh pô pioh kơ tue hiu čhưn dlăng mơak. Hlăm wưng msĕ snei jign drei lŏ hưn mdah kơ knhuah gru dhar kreh pô, lehanăn hŏng dŭm mta klei mâo phung tue čiăng, lehanăn amâo mâo djŏ ôh jing mâo hĕ klei myun dưi mkŏ mjing ênŭm kơ dhar kreh anak Ê Đê hlăm alŭ wăl, kyua anăn pô mơak snăk kkuh drông tue hriê čhưn hlăm yan tết anei”.

Jing sa hlăm phung tue hiu čhưn ruah leh čar Daklak jing anôk truh hlăm dŭm hrue akŏ thŭn mrâo, Nguyễn Thiên Đăng, hriê mơ̆ng Đồng Nai bŏ hŏng klei mtlŭk mtlak mơak hlăm klei yăl dliê: Hlăm dŭm hrue êgao, amâo mâo djŏ knŏng mâo dưn klei jăk êđăp lăn ala yan adiê krĭng anei, hŏng klei mtah mda ana kyâo mtâo, dưi lŏ mâo ƀuh lehanăn dlăng dŭm knhuah gru dhar kreh bŏ hŏng klei jăk siam tinei. Boh nik, gưl tal êlâo pô nao mbĭt hŏng êpul tông čing, nao hlăm klei bi kdŏ čhuang, lehanăn mnăm kpiê čeh ti djiêo kpur pui.

“Dơ̆ng mơ̆ng knuê leh kâo nao hiu hlăm lu anôk, hmư̆ klei tông čing čhar, long mnăm kpiê čeh, mâo ƀơ̆ng čĭm ăm bŏ hŏng klei jăk, lehanăn nao kdŏ čhuang mbĭt hŏng lu mnuih”.

 Huỳnh Thị Thuỷ, khădah hdĭp lehanăn mă bruă ti čar Daklak mơ̆ng lu thŭn leh, ƀiădah thŭn anei gŏ sang ñu ruah ƀuôn Akŏ Dhông - Buôn dôk hlăm krah ƀuôn prŏng čiăng hiu mơak yan mnga. Tui si ñu, anei jing hdră jăk hĭn čiăng kơ phung hđeh thâo ƀuh lehanăn mâo klei thâo mpŭ kơ dhar kreh đưm.

Dlăng lehanăn mđing hmư̆ klei bi mdêč čing, nao hlăm dŭm klei mkŏ mjing dŭm knăm mơak, lehanăn lông ƀơ̆ng dŭm mta mnơ̆ng ƀơ̆ng jiă knhuah gru djuê ana tinei, sĭt nik srăng đru kơ phung anak thâo săng hĭn kơ dhar kreh krĭng wăl anei:

“Tết thŭn anei kâo ba gŏ sang kâo hriê čhưn hlăm alŭ wăl hiu čhưn ênguê anei, čiăgn mđrăm mbĭt hŏng ai êwa mơak tết tinei. Anôk mâo lu bruă ngă jiă hnuah gru mơ̆ng đưm đă, mbĭt anăn mđrĭng hŏgn knhuah ênuk ară anei. Mâo klei mdêč čing, lông mnăm kpiê čeh. Kâo čang hmăng kơ gŏ sang kâo thâo ƀuh lehanăn thâo săng kơ dhar kreh anăn. Drei hdĭp tinei, brei drei thâo săng lu hĭn, lehanăn phung anak kâo brei thâo ƀuh, snăn wưng Tết yơh jing mmông găl hĭn êdi”.

Yan mnga ti Daklak amâo mâo djŏ knŏng mâo yan adiê jăk siam êđăp, ƀiădah lŏ jing wưng čiăng kơ jih jang mnuih mâo klei bi mguôp sĭt hŏng dhar kreh hlue knhuah gru djuê ana tinei. Mnuih ƀuôn sang lehanăn phung tue bŏ hŏng klei mơak mâo drông sa yan mnga  kluôm ênŭm, anôk dhar kreh lehanăn lăn adiê jăk ênang hnŭk êngiê, mdưm nanao hlăm ai tiê sa klei amâo mâo dưi wơr ôh mơ̆ng anăn./.