Sa aguah ưm, ƀuôn Kon Wang, hlăm ƀuôn hgŭm Tân Tiến (kdriêk Krông Pač hđăp), čar Dak Lak, klei siam kma mbĭt hŏng săp pui mơ̆ng sang tia msei mơ̆ng sa čô leh mduôn. Êgao leh 80 thŭn, A Lih ăt dôk guiñ guiñ hŏng kpur pui hrah, ênai kmŭt biêng mbĭt hŏng pui mngač.

Khădah thŭn leh khua, ală mta A Lih ăt adôk mngač, kngan dôk kjăp ăt msĕ hŏng dŭm bĕ dhŏng, wăng kgăn ñu tia leh dŭm pluh thŭn êgao. Phung hlăm ƀuôn kreh lač: “Hmư̆ ênai kmŭt mơ̆ng A Lih, A Hluh thâo yơh dơ̆ng mrâo dhŏng kgă jăk kơ bruă pưk hma”. Ƀiădah, čiăng krơ̆ng kơ tia msei hjei hlăm ênuk anei kăn ênưih leh. A Lih brei thâo:

“Êlâo dih dưi ƀuh klŏ msĕ ti hnoh êa. Ară anei amâo lŏ mâo ôh. Čiăng tia srăng nao blei msei, msei ăt yuôm mơh. Sa hlâo dhŏng, wăng đa đa truh sa hruê kăm kơh dưi leh, mmông anăn pô kăn thâo nao hma. ƀiădah khăp kơ bruă, si thâo lui hĕ!”

Grăp hruê, mnuih ƀuôn sang hlăm ƀuôn ba kơ ñu ñip êdeh ôtô hđăp, grăp klŏ msei dưi akâo, amâodah mlih hŏng ktơr, mdiê, mnŭ, ŭn…Amâo mâo guôn prăk kăk, diñu nao ti anôk tia msei knŏng čiăng kơ dhŏng ƀơ̆ng, wăng kgă kjăp. Aduôn La Ghi, mnuih Sêdang ti ƀuôn Kon Wang, mgei ai tiê yăl dliê:

“Gŏ sang kâo ăt kreh ba ŭn, mnŭ čiăng mlih hŏng dhŏng, hŏng wăng. Mnơ̆ng yua mơ̆ng A Lih tia jing rơ̆ng êdi. Tơdah jhat lŏ ba kơ ñu kƀêñ lŏ jing msĕ hŏng mrâo. Kâo hmăng hmưi ñu mâo klei suaih pral, leh anăn yuôm bhăn hĭn čiăng lŏ mtô kơ anak čô hmei, čiăng kơ bruă anei amâo mâo luč ôh…”

Ti ƀuôn Kon Wang, ruah tia msĕ amâo djŏ knŏng jing hdră duh ƀơ̆ng, ƀiădah lŏ mjing mgăt êwa mơ̆ng yang ƀuôn. Ênai kmŭt biêng amâo djŏ knŏng tia msĕ, ƀiădah lŏ mjuăt hlăm ai tiê, bluh mngăt êwa hlăm grăp mta mnơ̆ng yua mă bruă knuă. Anăn amâo djŏ knŏng jing anôk mtô bruă, ƀiădah lŏ jing wăl djă pioh mgăt êwa mơ̆ng bruă tia msei, anôk djă pioh knhuah dhar kreh dưi lŏ čuê hŏng ênai kmŭt biêng, hŏng êlan sah siam, ksul mbŭ dhar kreh leh anăn klei ktưn mơ̆ng mnuih Sêdang. A Lih lŏ yăl dliê:

“Ti ƀuôn ară anei knŏng mâo mă ƀiă pô thâo tia msei msĕ si Mêp, Hluh, Roi Pôa Hlak ti alŭ 5. Mnuih ƀuôn sang ăt čiăng êdi dhŏng, kgă ku, wăng…Mnơ̆ng yua hlăm sang čơ jing lu ƀiădah amâo mâo đei jăk ôh. Dhŏng pô tia găl hŏng kngan pô, ƀơ̆ng leh anăn rơ̆ng mơh. Anăn jing mngăt êwa, klei kdlưn mơ̆ng bruă tia msei!”

Amai La Ghon, mnuih Sêdang ti Ea Mao, sa čô kreh blei dhŏng kgă ti sang ñu brei thâo:

“Dhŏng anei pô djă găl, ƀơ̆ng leh anăn rơ̆ng. Bi dhŏng blei sang čơ yua dua tlâo hruê lăl yơh, ênưih ƀah mơh. Kâo knang leh anăn khăp kơ mnơ̆ng yua mơ̆ng phung hlăm ƀuôn mkra mjing…”

Bruă tia msĕ jing klei ktưn hưn mơ̆ng dŭm ênuk hŏng anei mơ̆ng mnuih Sêdang. Khădah klei hdĭp mrâo mrang mâo lu mta mnơ̆ng yua jăk hĭn, ƀiădah mnuih Sêdang ti ƀuôn Kon Wang ăt dôk kjăp hŏng bruă tia msei. Kyua anăn jing mngăt êwa mơ̆ng knhuah gru bruă knuă. Grăp êlah pui lŏ bi hlơr kơ knhuah grui dhar kreh djuê ana.

Ênai kmŭt kwang ti krah čư dliê Kon Wang, êjai pui dôk trơ̆ng hlăm kpur pui lăn…Kâo đăo knang, knhuah gru mơ̆ng mnuih Sêdang srăng lŏ hdĭp nanao, msĕ si êlah pui hlăm ai tiê phung mduôn, phung hgăm ƀiădah mâo kơhưm, dôk krơ̆ng kơ knhuah gru djuê ana pô.