Drei dôk hmư̆ kdrêč ênai đĭng buôt čhôč leh anăn ênai kưt mơ̆ng pô thâo mbruă Y-Đhin Niê (Ama Ruin), ti ƀuôn Triă, ƀuôn hgŭm Ea Tul, čar Dak Lak. Ayŏng jing pô thâo mbruă mda asei dôk thâo khan Êđê, thâo mkra đĭng buôt knhuah gru djuê ana Êđê. Pô thâo mbruă Y-Đhin brei thâo, đĭng buôt amâo djŏ knŏng jing đĭng đrao ôh, ƀiădah lŏ jing klei yăl dliê kơ dhar kreh, čiăng mâo klei mbruă leh anăn thâo kơ ênai. Tơdah phung mda asei amâo mâo hriăm, amâo mâo djă pioh, dŭm ênai đĭng buôt, klei kưt, eirei srăng luč ram yơh. “Lu mnuih mĭn mkra đĭng ƀuôt jing ênưih, ƀiădah klă sĭt amâo djŏ ôh grăp čô thâo mkra sơăi, kyuadah čiăng klei thâo kral kơ ênai. Ară anei, hlăm ƀuôn sang, phung thâo mbruă khua thŭn đuê̆ nao jih leh, bi phung mda asei knŏng adôk hjăn kâo thâo mkra đĭng buôt anei. Kâo ăt srăng mtô kơ phung anak čô mkra đĭng buôt, čiăng kơ knhuah dhar kreh djuê ana pô amâo mâo luč ram, amâo mâo wơr hĕ ôh.”

Hlăm lăm sang krum Êđê ti ƀuôn Phơng, ƀuôn hgŭm Ea Tul, čar Dak Lak, pô thâo mbruă Y-Khĭm Niê Siêng dôk tông dŭm ênhiang čing, yăl dliê kơ phung hđeh kơ dŭm hruê knăm mơak, kơ klei yuôm mơ̆ng grăp ênai. Hŏng ñu, grăp ênhiang čing jing sa klei mtă mtăn kơ dhar kreh Êđê, knŏng lŏ hdĭp êjai dưi lŏ čuê. Ñu ăt mĭn nanao êjai phung mda asei kbưi ƀrư̆ ƀrư̆ hŏng ênai čing, kyuanăn gĭr jih ai tiê kơ bruă mtô klei tông čing. “Čing jing mnơ̆ng amâodưi kƀah hlăm klei hdĭp mnuih Êđê. Čing kreh ba yua hlăm dŭm klei yuôm bhăn msĕ si đĭ dôk sang mrâo, klei djiê brŭ (mbĭt hŏng hgơr), ngă yang akâo klei suaih pral, amâodah hlăm klei huă êsei mrâo…Ênai čing nao mbĭt hŏng dhar kreh, klei đăo knang mơ̆ng ƀuôn sang. Čing amâodưi kƀah hlăm klei hdĭp êpul êya. Kyuanăn, tơdah phung mda asei hlăm ƀuôn ka thâo, hmei jing phung nao êlâo srăng mâo bruă klam mtô kơ anak čô amâo mâo wơr ôh knhuah siam dhar kreh mâo mơ̆ng aduôn aê.

Ăt mâo klei khăp mkra mjing kdrăp pĕ tông mơ̆ng djuê ana, pô mbruă Y-Lương Niê (Aê Thun) ti ƀuôn Triă, ƀuôn hgŭm Ea Tul, čar Dak Lak khăp kơ bruă mkra đĭng năm. Mơ̆ng klei djiê ƀrŭ truh kơ klei mơak hlăm knăm mơak, ñu ăt mtô kơ anak čô čiăng kơ ênai đĭng năm kwang nanao hlăm êpul êya. “ Êlâo dih đĭng năm knŏng yua hlăm klei djiê brŭ. Ară anei dưi kwang hlăm lu knăm mơak hlăm yang ƀuôn. Čiăng krơ̆ng kơ knhuah dhar kreh jăk siam anei, klei yuôm bhăn hĭn jing brei phung mda asei hriăm leh anăn lŏ čuê.

Mơ̆ng ênai đĭng buôt, ênai jing kwang truh kơ ênai đĭng năm…phung thâo mbruă mnuih Êđê dôk gĭr čiăng kơ dŭm ênai siam anăn mơ̆ng djuê ana kwang nanao hlăm yang ƀuôn. Diñu lŏ bi čuê klei khăp čiăng leh anăn hmăng hmưi phung mda asei thâo khăp, thâo hriăm, djă pioh knhuah gru dhar kreh djuê ana pô./.