Boh knôk jing sa mta ana čŏng čăt jing. Boh knôk gơ̆ bhiar, dlăng čiăng msĕ hŏng boh mnga kting, dlông hlăm brô 1m, mâo êa mil mtah lehanăn kreh mboh lu ti êdŭk dhan. Boh nik, mnga, knăt lehanăn boh knôk mâo lu mnuih krĭng Lăn dap kngư yua mkra dŭm mta djam ƀơ̆ng jăk. Hlăm anăn, boh knôk dưi mkra lu mta djam jăk đŏk kƀông msĕ si lŭk, đeh hŏng čĭm, tŭk djam hŏng kan êa amâo dah kơŭl tak hŏng amrêč hra, tak măm amâo dah tlê hŏng trŏng phĭ. Klei phĭ mơ̆ng boh knôk hla mbĭt hŏng klei msĭn mơ̆ng hra, klei hăng mơ̆ng amrêč, mjing leh mnâo mnañ jăk êdi amâo dưi wơr hŏng hlei pô tuôm ƀơ̆ng leh.

Amai H’Trich Niê, ti ƀuôn Êbŭng, să Êa Ktur, čar Dak Lak brei thâo, boh knôk jing sa mta djam ƀơ̆ng siă suôr leh hŏng ñu dơ̆ng mơ̆ng hlăk điêt.

“Êlâo adih, grăp blư̆ nao ti pưk hma hŏng di aduôn lehanăn amĭ ama, diñu kreh mkra djam knôk, djŏ hruê tak amrêč hra, djŏ hruê tak măm, sa mta djam jăk êdi kâo ƀơ̆ng. Kâo hdơr nanao kơ mnâp mnañ phĭ mmih hlăk anăn”.

Boh knôk leh dưi pĕ ba wĭt ti sang, drei ba hơr ti dlông pui, brei gơ̆ khiă tôk ti êngao čiăng kơ ƀiă mnâo phĭ lehanăn mâo mnâo jăk. Leh kơnăn, drei mă dhŏng kuêh hĕ tôk khiă, rao hlăm êa lehanăn khăt êpih. Tui hluê hŏng klei mưng ƀơ̆ng lehanăn tŭk knă mdê bi pô, grăp čô srăng mâo hdră tŭk knă mdê mdê.

Amai H’Sily Ayŭn, ti Ƀuôn Čuôr Dăng, să Čuôr Dăng brei thâo, mơ̆ng 1 – 2 boh knôk dưi mâo leh djam ƀơ̆ng jăk jĭn.

“Leh mkra, khăt êpih boh knôk man dưn ƀơ̆ng, drei dưi lŭk hŏng kan krô, drei đeh leh êlâo anăn, amâo dah kan ăm, čĭm êmô, čĭm ŭn… dưm dŭm mta mnơ̆ng bi ƀăt, hla ƀâo mngưi msĕ si êgil, amrêč lehanăn lŭk mbĭt lehanăn drei ƀơ̆ng yơh. Klei phĭ, mmih mơ̆ng boh knôk hlai mbĭt hŏng amrêč hăng, êbhui praĭ mơ̆ng čĭm, kan; klei ƀâo mngưi mơ̆ng hla djam, mjing sa mta djam jăk êdi”.

Amâo djŏ knŏng jing sa mta djam ƀơ̆ng kreh mâo aguah tlam, ƀiădah hlăm dŭm knăm mơak, mnuih Êđê kreh mkra djam mơ̆ng bok knôk kơ tuê hriê čhưn, msĕ si sa asăp jak iêu lông ƀơ̆ng mta djam jiă knhuah čư̆ dliê anei. Ayŏng Y-Suyên Bkrông, ti să Êa H’Ning, brei thâo snei:

“Hruê anei, khădah mâo lu mta djam mtam mrâo, ƀiădah mnuih Êđê pô ăt mâo klei mưng mkra lu mta djam mơ̆ng boh knôk. Lehanăn hlăm knăm mơak huă asei mrâo mơ̆ng gŏ sang kâo, kâo mkra leh djam mnga knôk lŭk hŏng čĭm ŭn, čiăng kơ mnuih ƀuôn sang hdơr nanao kơ mta djam jiă mnâo mnañ krĭng čư̆ dliê Lăn dap kngư pô”.

Hŏng kiê kngan thâo mbruă, mnuih Êđê mkra leh lu mta djam jăk đŏk kƀông  mơ̆ng boh knôk. Hŏng phung tuê hiu čhưn ênguê, lông ƀơ̆ng dŭm mta djam mơ̆ng boh knôk jing klei tui ksiêm kơ klei jăk ênang, bŏ hŏng klei khăp mơ̆ng mnuih ƀuôn sang krĭng čư̆ dliê Lăn dap kngư, đru bi lu jơr pŏk rup mnơ̆ng ƀơ̆ng huă krĭng Lăn dap kngư./.