Hlăm gưl hiu čhưn ênguê ti ƀuôn mñam añuê ênâo Phú Tân (ƀuôn hgŭm Ô Laon, čar Dak Lak), aduôn Nguyễn Huỳnh Phương, tuê mơ̆ng ƀuôn prŏng Cần Thơ, gưl tal êlâo čŏng pô khăt ana ênâo, bhu ênâo, tram êa mil, leh anăn dôk ti anôk mñam čiăng mñam sa blah añuê. Nguyễn Huỳnh Phương brei thâo, grăp bruă brei ƀuh klei suăi êmăn, klei mbruă mơ̆ng phung ngă bruă.

            “Mñam sa blah añuê ƀuh klei mbruă êdi, ăt ƀuh klei mơak, mrâo ngfă ƀuh dleh mơh, ƀiădah leh mưng pô ăt mñam pral, ăt hdjul mơh.

Kah knar grăp hruê, ƀuôn ngă bruă Phú Tân drông dŭm pluh čô tuê nao čuă dlăng, ksiêm hriăm leh anăn lông mñam añuê. Mơ̆ng klei knŏng ngă êjai mmông wăl, dŭm gŏ sang mñam añuê ară anei lŏ mâo thiăm bruă mrâo jing drông tuê leh anăn mtô kơ tuê mñam añuê. Amai Lê Thị Bích Liêm, ti alŭ Phú Tân 1 lač, anei amâo djŏ knŏng jing ngă bruă duh mkra, ƀiădah lŏ jing hdră kriê pioh mnơ̆ng dhơ̆ng ƀuôn sang.

 “Mñam añuê čiăng mâo klei nik leh anăn rơ̆ng. Ti lăn čar pô ăt mâo lu čar msĕ si kwar yŭ amâodah kwar Dưr ăt mâo ƀuôn mñam añuê. Ƀiădah grăp ƀuôn mâo dhar kreh mdê mdê. Hŏng ƀuôn mñam anuê ênâo Phú tân ăt mâo knhuah dhar kreh mdê hjăn, kâo ăt hmăng hmưi grăp čô dưi thâo kơ knhuah dhar kreh mdê hjăn mơ̆ng añuê ênâo, đru mguôp kơ klei hdĭp mnuih ƀuôn sang ti ƀuôn ngă bruă dưi bi hơĭt hĭn”.

Čiăng drông tuê, dŭm êpul hgŭm bruă ti Phú tân mkŏ hŏng knơ̆ng bruă hiu atăt tuê, pŏk tour lông ngă bruă mơ̆ng 350.000 – 600.000 prăk hlăm sa čô. Phung tuê dưi đĭ mran, đĭ êdeh kai nao dlăng kdrăn ana ênâo, wiă ênâo, kuôl klei ênâo, hrĭ, tram êa mil, mbĭt anăn dưi hriăm mñam čiăng ngă mnơ̆ng djă pioh. Dŭm mta mnơ̆ng mơ̆ng ana ênâo dưi bi lu jơr, mơ̆ng mnơ̆ng djă pioh điêt msĕ si mnơ̆ng kă kliăng, dŏ pưh, kdô čiêng truh kơ dŭm mta mnơ̆ng prŏng msĕ si bai, đăl kŏ… Nguyễn Anh Quân, khua êpul hgŭm bruă An Cư, ti alŭ Phú Tân 1, brei thâo:

“Êpul hgŭm bruă dôk mđing kơ klei jăk hŏng wăl hdĭp mda, djă pioh jih jang dŭm knhuah gru mơ̆ng đưm truh kơ ară anei msĕ si mnơ̆ng yua tram êa mlih ênâo, hrĭ ênâo, hrô kơ bruă tuh tia ară anei amâodah dŭm klei lông dlăng jăk msĕ si đĭ mran ênâo čiăng kơ phung tuê thâo klă hĭn”.

Hluê si Lê Thị Mai Thoa, khua alŭ Phú Tân 1, bruă mñam añuê ênâo ti nei mâo leh êbeh 100 thŭn leh anăn dưi tŭ yap jing ƀuôn mă bruă đưm mơ̆ng thŭn 2013. Ară anei mâo êbeh 540 gŏ sang nao hgŭm, čŏng pô mñam, ăt yua wăt măi kčoh mrâo čiăng mđĭ hnơ̆ng. Êngao kơ anôk ba čhĭ ti Krah kwar Dhŭng leh anăn Lăn Dap Kngư, phung tuê hriê tinei lu đru kơ mnuih ƀuôn sang mâo thiăm hnư prăk hrui wĭt.

“Tơdah ti sang mâo sa čô hđeh leh anăn sa čô prŏng ăt dưi ngă mơah, hđeh điêt ăt thâo mñam añuê. Yua mnuih mă bruă hlăm gŏ sang dưi mñam añuê, dưi ngă lŏ, dưi mâo rơ̆k kơ êmô, khăt ana ênâo čiăng mkra añuê ba čhĭ, mkŏ mjing hnư hrui wĭt kơ gŏ sang. Alŭ wăl ăt mkŏ mjing klei găl mđĭ mđĭ kyar bruă huĭ dah mnuih ƀuôn sang čhĭ jih ênâo amâo lŏ dưi djă pioh bruă đưm. Ară anei mâo sa êpul hgŭm bruă mơ̆ng ayŏng Nguyễn Anh Quân dôk mđĭ kyar bruă leh anăn bi mguôp hŏng knơ̆ng bruă hiu čhưn ênguê hưn mdah ƀuôn mñam añuê ênâo”.

Hŏng klei mbruă hlăm hdră ngă, ƀuôn mñam añuê ênâo Phú tân dôk duah anôk dôk mrâo. Hiu čhưn ênguê amâo djŏ knŏng ba wĭt boh tŭ bruă duh mkra, ƀiădah lŏ đru kriê pioh, bi lar dhar kreh knhuah gru ti ƀuôn mă bruă êtuh thŭn anei. Mơ̆ng anei, añuê ênâo leh anăn dŭm mnơ̆ng dhơ̆ng mơ̆ng ênâo srăng mâo klei hdĭp mrâo, pŏk êlan nao mrâo ƀiădah ăt dôk krơ̆ng kơ mgăt êwa knhuah gru hlăm klei hdĭp mrâo mrang.