Sang Xong, ti wăl krah ƀuôn Kon Wang, să Tân Tiến (Dak Lak), kwang nanao ênai jar mñam. Sa čô mniê êbeh 60 thŭn ăt grăp hruê gĭr mñam, kngan mpral mbruă, mñam blah mñam jăk siam lu êa mil. Xong brei thâo:“Kâo mphŭn mñam jing amĭ pô mtô.

Hruê anăn,  hriăm mñai êjai, ngă pưk hma êjai čiăng mâo mnơ̆ng ƀơ̆ng huă kơ gŏ sang. Leh amĭ kâo djiê, kâo gĭr lu snăk. Leh dôk ung, kâo rông anak êjai, hriăm mñam êjai, kâo ăt hriăm thiăm bruă mñam, mơ̆ng ai jhung truh kơ mơiêng djuê ana. Truh kơ anak čô hriê kơ prŏng, kâo mâo lu mmông čiăng hriăm hră, mñam lu mta mnơ̆ng dhơ̆ng čiăng yua hlăm gŏ sang leh anăn čhĭ kơ mnuih ƀuôn sang hlăm ƀuôn.”

Mơ̆ng jar mñam anăn, Xong amâo djŏ knŏng mâo thiăm prăk hrui wĭt ôh ƀiădah lŏ mtô bruă mñam kơ anak čô leh anăn mnuih ƀuôn sang hlăm ƀuôn lŏ čuê knhuah dhar kreh djuê ana. Ară anei, ti să Tân Tiến, Dak Lak, mkŏ mjing leh sa êpul mñam kdrăp djuê ana mâo 7 čô, hŏng gưl thŭn mdê mdê. Amai Phân, sa anak čô mniê Xong, bi êdah:“Tal êlâo kâo hriăm mơ̆ng amĭ, êdei anei amĭ kâo djiê, kâo lŏ dơ̆ng hriăm kơ Xong. Ñu mtô kơ kâo klei dăng mrai, dưm mrai êa mil, gru đêč. Ară anei kâo thâo leh mñam băn ƀă, băn msăm. Ami da Xing mbruă snăk hlăm klei bi mguôp êa mil, êlan mñam kjăp, gru đêč siam. Kâo leh anăn amai adei khăp snăk, čang hmăng ñu mtô lu hĭn. Bi mni kơ amĭ da Xong pioh leh bruă djuê ana. Hmei phung mda asei srăng lŏ čuê, amâo brei bruă mñam luč ram.”

 Kdrăp djuê ana kyua êpul mnam ti Tân Tiến mkra mjing mâo lu phung ƀuôn sang khăp blei yua. Mrâo anei, mâo sa anôk tă kčoh ti Ƀuôn Ama Thuôt , čar Dak Lak mơĭt kơ Xong 7 thŭng mrai, čiăng mñam ao djuê ana Sêdang pioh ba čhĭ.

 Kdrăp djuê ana Sêdang khăng mâo tlâo êa mil phŭn, anăn jing: kô̆, jŭ leh anăn mtah. Kdrăp djuê ana kô̆ khăng yua hlăm knăm mơak, gru đêč bi êdah klei jăk siam, jăk mơak. Kdrăp djuê ana jŭ bi hmô kơ lăn, êngĭt adiê. Gru đêč bi hmô ai tiê bi hgŭm, klei răng mgang mơ̆ng êpul êya. Kdrăp mñam mtah mjing klei mrâo mrang, jăk siam, djŏ guôp hŏng kdrăp hlăm knăm mơak leh anăn mjĕ êrô dhar kreh..

Amai Phan, sa čô mnuih ƀuôn sang ti ƀuôn Ea Mao, să Tân Tiến brei thâo:“Amâo uêñ kơ ya knăm mơak hlăm ƀuôn, grăp čô hơii kdrăp djuê ana Sêdang. Hơô ƀuh ktưn hưn snăk. Aduôn aê pioh kơ pô, bi ară anei lŏ mâo phung aduôn, phung mbruă msĕ si Yă Nhân, Yă Nhoa ( jing Xong) kriê pioh snăn hmei mpŭ hĭn, čiăng hơô kdrăp djuê ana pô. Siam snăk leh anăn rơ̆ng hĭn.”

Hŏng klei khăp leh anăn klei gĭr, pô mbruă Xong ngă leh anăn dôk kriê pioh kơ bruă mñam mnuih Sêdang lar nanao. Mơ̆ng kngan ñu leh anăn phung mniê ti Tân Tiến, dŭm blah mñam jăk siam lu êa mil lŏ dơ̆ng hrăm mbĭt hŏng anak čô hlăm klei hdĭp hruê anei.