Bur ktơr jing mnơ̆ng ƀơ̆ng kreh ƀơ̆ng, mâo hlăm klei hdĭp mnuih ƀuôn sang mơ̆ng leh mâo boh mnga bruă pô pla mjing hlăm mnuih djuê ana K’Ho. Čiăng dưi mâo boh ktơr siam mmih, snăn mnuih pla mjing ruah mjeh ktơr mmih, ƀâo mngưi, ba pla mjing, dlăng kriê wiê ênăk kebưn hma pô tơl truh yan đăk ktơr. K’ Bri ti ƀuôn hgŭm Đinh Văn Lâm Hà, čar Lâm Đồng brei thâo:“Tơdah ktơr khua leh, drei dơ̆ng đăk ktơr, dah ktơr krô leh boh snăn hlŏng ƀhu bi thu ktơr dlông pra pui, amâodah ƀhu hlăm mđiă kơ tač, leh mơ̆ng anăn pleh asăr, ba tăp mơ̆ng anăn mâo braih ktơr leh tăp”.

Braih ktơr leh tăp ñu amâo mâo ƀhĭ msĕ hŏng kpŭng ktơr ôh, ƀiădah knŏng mčah knar hŏng asăr braih, mơ̆ng anăn mơh kreh pia jing braih ktơr. Braih ktơr mčah leh tăp ẳt dôk đuôm mbĭt hŏng suôp êngao, kyuanăn tơdah leh drei riă, amâo mâo djŏ knŏng êun, ƀâo mngưi mdhư̆ mdhưi. Klei riă bur ktơr brei mâo bruă ngă ƀhĭ klĭ djăp ênŭm ƀrư̆ ƀrư̆. Čiăng kơ riă ktơr hmăr ksă lehanăn mâo klei êun jăk, mnuih K’Ho kreh tram hĕ êlâo braih ktơr, leh kơ anăn riă hŏng pui êdu man dưn hlăm sui mmông. Êjai dôk riă, hdơr kwă jêñ jêñ čiăng kơ bur ksă tar, lehanăn amâo mâo khiă ôh ti tluôn gŏ. Ha Zu Na, ti ƀuôn hgŭm Đinh Văn Lâm Hà, čar Lâm Đồng, brei thâo:“Bur ktơr drei riă jing ênưih, amâo mâo mtlaih hŏng braih ôh, kăn riă mbĭt hŏng klang čĭm rei. Braih ktơr dưm hlăm gŏ plêč bi doh lehanăn tuh êa, riă hlăm kpur djuh tơl bur êun lik. Mnuih K’Ho khăp snăn, kyuadah ăt adôk ênŭm mnâo mnañ mơ̆ng boh ktơr.”

Bur ktơr kreh ƀơ̆ng mbĭt hŏng kan krô tlê, kan hŭl, kan êa hnoh ăm ƀâo mngưi mbĭt hŏng djam dliê kŭl amâodah đeh hŏng êa prăi, tak amrêč hră. Jih jan djam dliê ƀơ̆ng mbĭt hŏng bur ktơr bi ƀuh mnâo mnañ jăk êdi mơ̆ng jih jang mnơ̆ng ƀơ̆ng anăn. Amai   K’ Huyền, ti ƀuôn hgŭm Đinh Văn Lâm Hà, čar Lâm Đồng, brei thâo: Djăp mta djam mtam ƀơ̆ng mbĭt anăn lŏ bi knăl kơ knhuah ƀơ̆ng huă hlăm mnuih djuê ana K’Ho.“Êjai kâo dôk ƀơ̆ng bưng bur anei, kâo ƀuh mâo mnâo jăk êdi. Bur êun kdlik lehanăn eneưih snăk ƀơ̆ng. Klă sĭt bur anei amâo mâo riă hŏgn klang hŏng čĭm ôh, ƀiădah bur ăt jăk kyua braih ktơr.”

Bur ktơr bi êdah knhuah mnơ̆ng ƀơ̆ng jăk lehanăn jing djŏ guôp hŏng yan adiê anôk mnuih djuê ana K’Ho “ƀơ̆ng huă tui si yan”, ya dŏ lăn dliê mâo bi thâo dưn yua. Kreh ƀơ̆ng bur anei leh mmông suăi êmăn mă bruă, đru bi kjăp tian, lŏ kơrŭ wĭt ai tiê mă bruă, lehanăn ngă kơ ai tiê m’ai dhuai hĭn, jing leh dŏ yuôm bhăn mơ̆ng lăn adiê mâo leh klei suăi êmăn mơ̆ng bruă knuă.

Ti krah klei hdĭp mtluk mtlak mơ̆ng ƀuôn prŏng mnuih lu, êjai mnơ̆ng ƀơ̆ng huă ênuk mrâo mrang lu jơr, snăn wĭt kơ ƀuôn sang pô, bur ktơr jing mnơ̆ng ƀơ̆ng jăk êdi hlăm djuê ana K’Ho ăt dôk djă pioh nanao mơ̆ng dŭm ênuk. Hlăm bưng bur ktơr, amâo mâo djŏ knŏng klei mmih mơ̆ng ktơr, klei ƀăt mơ̆ng kan ăm, mơ̆ng amrêč hră tlê, tinăn lŏ hdơr kơ klei hdĭp mơak mñai hlăm ƀuôn sang anôk êđăp ênang mơ̆ng săp pui bluh đĭ mơ̆ng kpur, tinăn ƀuh amĭ lehanăn aduôn bŏ hŏng klei khăp./.