Anei jing ƀuôn tal 4 dưi tŭ yap jing ƀuôn hiu čhưn ênguê yang ƀuôn. Mơ̆ng knhal jih thŭn 2023, hluê si klei bi klă mrô 2433 mơ̆ng bruă sang čư̆ êa čar Dak Lak, ƀuôn Tơ̆ng Jŭ dưi đru kơ mnơ̆ng yua, kdrăp yua, kdrăp pĕ tông, măi tĭnh, jhưng mdhô̆ leh anăn mkŏ mjing mbah hâo hưn điện tử bruă hiu čhưn ênguê čiăng mđĭ kyar bruă hiu čhưn ênguê yang ƀuôn hŏng hdră kluôm dhuôm hĭn.

Hluê si Knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak. Ƀuôn Tơ̆ng Jŭ jing sa hlăm 4 ƀuôn dưi tŭ yap jing ƀuôn hiu čhưn ênguê yang ƀuôn hlăm thŭn anei, mbĭt hŏng 3 ƀuôn jing Ƀuôn Tuôr (ƀuôn prŏng Ƀuôn Ama Thuôt), Ƀuôn Kly ( wăl krah Ƀuôn Hồ) leh anăn ƀuôn Jun (kdriêk Lak). Anei jing bruă prŏng mơ̆ng dhar bruă hiu čhưn ênguê mđing truh bi hdơr 120 thŭn mkŏ mjing čar Dak Lak. Sơnăn, truh kơ ară anei, čar Dak Lak mâo leh 7 ƀuôn hiu čhưn ênguê yang ƀuôn dưi mkŏ mjing leh anăn ngă bruă.