Ktrâo kơ mơiêng dôk ƀar, amai K’Hều, ti alŭ mrô 1, să Đưng Knớ, kdriêk Lạc Dương, čar Lâm Đồng hŏng klei mơak bi êdah, anei jing m’iêng kngan ñu pô mñam dăl hlăm dua hrue kăm. Amai K’Hều yăl dliê, lu phung amai adei hlăm alŭ bi jak lŏ wĭt hlăm bruă pơ̆k mñam, leh mâo bi lar klei čhĭ mnia hlăm hla pŏk yang ƀuôn, snăn mâo lu snăk mnuih duah êmuh čiăng blei.

“Pô pŏk facebook kâo hưn, dôk mñam mnơ̆ng, tơdah hlei pô čiăng ya mta mnơ̆ng pioh mñam snăn kâo srăng mñam. Kâo ƀuh dưi čhĭ mnơ̆ng pô mñam, pioh mâo prăk yua aguah tlam. Mơ̆ng anăn kâo mâo klei khăp hĭn, čiăng mñam bi pral, anăp anei kâo lŏ dơ̆ng hriăm lu hĭn”.

Bi amai Bon Niêng K’Huyên, dôk mbĭt hlăm sa boh ƀuôn. Kyua jing mnuih thâo mñam, snăn gơ̆ dưi lŏ mâo prăk čhĭ mnơ̆ng pô mñam.

“Kâo hriăm lehanăn thâo mñam mâo sa thŭn êgao leh. Hlăm mmông wăn kâo mñam leh jing mnơ̆ng ba čhĭ ti Lạc Dương mâo mnuih kăp blei, hŏng ênoh mơ̆ng 550-600 êbâo prăk sa blah, sa mlan mâo 4 blah. Ară anei hur har êdi hŏng bruă mñam kpañ, čiăng lŏ pŏk adŭ mtô bi hriăm bruă mñam čiăng kơ đăm luič ram ôh”.

Tơdah leh mâo lu mnuih akâo mñam brei, snăn phung amai adei mkŏ mjing êpul dôk bi mñam čiăng bi leh hŏng ênoh lu mnuih akâo čiăng blei. Amai Bon Niêng K’Gut, ti alŭ mrô 1, să Đưng Knớ brei thâo, kyua mâo bi mguôp hŏng Caritas Đà Lạt, êpul pơ̆k mñam mơ̆ng amai lŏ mâo leh lu mnuih akâo mñam brei pioh ngă mơiêh ao bi kuôl ung mô̆, mprăp mnơ̆ng yua hlăm sang, mkra kdrăp čŭt hơô mrâo… Amai lŏ dơ̆ng pŏk adŭ mtô bi hriăm bruă pơ̆k mñam ti sang ñu pô, čiăng lŏ mâo lu mnuih nao đru bi mñam pioh čhĭ mnia.

“Kâo cviăng bi lar bruă anei truh hŏng hđeh êra, đru bi mjut mjing lu gru grua djuê ana pô. Mâo pŏk leh adŭ hriăm mơ̆ng thŭn dih, mâo pŏk truh kơ 15 čô mnuih riăm, snăn mâo leh ară anei mâo leh 5 thâo mñam raih dưi mñam hjăn lehanăn mâo leh mnơ̆ng pioh čhĭ. Tĭng kơ Caritas mkŏ mjing êpul mă bruă mbĭt hoơ̆ng hmei. Mâo mnuih kăp tam êa mil, mâo mnuih êwei, snăn mâo mnuih ngă bruă anei, ngă bruă dih djŏ tui si phung blei yua čiăng, lehanăn jih jang knhuah gru dhar kreh djuê ana pô amâo mâo luič ram ôh”.

 Hlam krĭng taih kbưi kdriêk Lạc Dương hŏng êbeh 90% jing mnuih djuê ƀiă sơăi, wưng leh êgao, să Đưng Knớmâo leh lu klei đru mơ̆ng Đảng lehanăn knŭk kna, mkŏ mjing bruă nah gŭ, dhiang ba êlan klei pui kmlă, rŭ mdơ̆ng sang hră, sang êa drao gŭn. Să mâo tŭ yap leh jing sa krĭng ƀuôn sang mrâo thŭn 2021. Mơ̆ng mlan 7 thŭn anei, kdriêk Lạc Dương bi êdah hdră êlan ciăng rŭ mdơ̆ng ƀuôn dhar kreh hiu čhưn ênguê hlăm yang ƀuôn să Đưng Knớ pŏk leh klei čang hmăng kơ bruă bi kriê pioh knhuah gru dhar kreh, mđrĭng hŏng bruă hiu čhưn ênguê hlăm alŭ wăl.

 Phi Srônh K’Ham, Khua êpul hgŭm bruă mniê să Đưng Knớ brei thâo, tui si klei kdriêk tă êlan, êpul hgŭm bruă mniê mâo mtrŭt mjhar lehanăn bi klin leh lu amai adei nao hlăm bruă pơ̆k mñam, ƀrư̆ ƀrư̆ dơ̆ng jing leh ƀuôn bruă dôk ngă klei hiu čhưn dhing.

“Kriê pioh lehanăn lŏ bi lar knhuah gru dhar kreh djuê ana pô, jing mjut bi hriăm hđeh gưl mrâo lŏ čuê, bi kriê pioh bruă anei, snăn digơ̆ tui hriăm bruă mñam kpañ, lehanăn ară anei mâo mñam leh lu mta mnơ̆ng jăk snăk, dưi lŏ mđĭ ênoh kơ digơ̆ mâo ba wĭt. Ară anei hŏng dŭm hdră êlan bi đru, êpul hgŭm bruă mniê hlăk iêo mklin leh truh 20 čô amai adei čiăng čan prăk pioh kơ bruă pơ̆k mñam, grăp gŏ sang dưi čan lu êdi jing 50 êklăk prăk ”.

 Hŏng jih jang bruă mâo leh alŭ wăl tă brei êlan kơ klei kriê pioh lehanăn mđĭ bi lar bruă mơ̆ng aê aduôn pô đưm, lu amai adei mniê mnuih K’Ho ti să krĭng taih kbưi Đưng Knớ lŏ dơ̆ng wĭt hŏng bruă mñam kpañ, mâo mñam leh lu mta mnơ̆ng mkra mjing kdrăp čŭt hơô mrâo lehanăn hlue knhuah đưm mơ̆ng mnal pô mñam. Bruă anei đru leh kơ mnuih ƀuôn sang lŏ mâo ênoh prăk ba wĭt, lehanăn mgi dih čang hmăng srăng dưi pŏk jing ƀuôn dhar kreh hiu čhưn ênguê hlăm ƀuôn sang mơ̆ng krĭng mkŏ mkra ƀuôn sang mrâo anei./.