Hŏng akŏ “Dak Lak - Klei čang hmăng guh mngač”, klei bi lông mkŏ mjing mơ̆ng ară anei truh jih hruê mgi, 9/11, hŏng giăn 350 knuă druh, phung hâo hưn mơ̆ng 13 kdriêk, wăl krah, ƀuôn prŏng hlăm čar Dak Lak hgŭm. Mbĭt hŏng klei bi lông ruê̆ êdeh hâo hưn, grăp anôk bruă srăng ngă sa hdră hâo hưn hŏng boh phŭn bi mni kơ Đảng, Awa Hồ, klei khăp kơ ƀuôn sang lăn čar, knhuah gru krŭ kdơ̆ng mơ̆ng lĭng kahan leh anăn mnuih ƀuôn sang dŭm djuê ana, boh tŭ hlăm klei mkŏ mjing leh anăn mđĭ kyar bruă duh mkra - ala ƀuôn, răng mgang ala čar - klei êđăp ênang, răng mgang klei dưi knông lăn, plao ksĭ.

Hlăm anăn, mñă klă dŭm boh tŭ hlăm 120 thŭn čar Dak Lak mkŏ mjing leh anăn mđĭ kyar leh anăn ai tiê bi hgŭm mơ̆ng 49 djuê ana hdĭp mda ti krĭng lăn Dak Lak. Anei jing bruă ngă dưi mkŏ mjing grăp gưl 2 thŭn sa blư̆ kñăm ksiêm dlăng boh tŭ bruă hâo hưn mtô mblang hdră êlan Đảng, hdră bhiăn Knŭk kna hŏng mnuih ƀuôn sang; mjing klei găl mjĕ êrô, mđĭ boh tŭ ngă bruă hâo hưn ti nah gŭ.