Ti Sang hră gưl 3 Trần Đại Nghĩa, kdriêk knông lăn Buôn Đon, Êpul hgŭm čih klei yăl dliê čar Daklak mkŏ mjing leh hdră “grăp paih hră mâo pŏk  – klei jăk kbiă hriê”. Tinei, phung hđeh mâo klei bi tuôm, dlăng klei rang mdah hră, dlăng hră lehanăn mâo anôk hlăp jăk hŏng dhar kreh, mjing pô bi hmô kơ mnuih hlăm klei yăl dliê, hlăm dŭm klei hlăp mgưt lehanăn dŭm klei kdŏ mnuiñ jăk siam.

Ƀri wưng anei, Êpul hgŭm bruă phung čih klei yăl dliê Daklak mđup brei leh dŭm pluh mta hră mơar kơ sang hră gưl tlâo Trần Đại Nghĩa lehanăn hưn mdah kơ hdruôm hră mơar “Hră klei yăl dliê, hră klei mrâo hriăm lehanăn hlue ngă knhuah mngač Hồ Chí Minh” mơ̆ng êpul hgŭm čih mkra. Hdruôm hră anei kpal êbeh 300 paih, jing lu mta klei čih mơ̆ng phung čih klei yăl dliê, phung ngă bruă klei mrâo ti Daklak hlăm lu mta bruă msĕ si klei čih kač rup, mă rup mdar rup, klei pĕ tông, klei yăl dliê, klei duê, lehanăn klei mrâo. Grăp mta jing sa klei yăl dliê, sa rup siam lač kơ klei hdĭp, mâo lu klei yuôm bhăn hlăm klei tui hriăm, lehanăn hlue ngă knhuah mngač Hồ Chí Minh. Pô thâo duê Nguyễn Tiến Sỹ, ti ƀuôn prŏng Ƀuôn Ama Thuôt lač:

 “Hŏng klei tui hriăm lehanăn hlue ngă knhuah Awa jing sa bruă prŏng. Kâo kreh mđing hlăm klei hâo hưn, kơ hƀuê ênuk lehanăn kơ ai tiê cách mạng, boh nik êjai wưng thŭn lăn čar dôk čhuang hlăm ênuk kpưn đĭ. Wưng leh êgao kâo mâo čih dŭm mta klei yăl dliê kơ knhuah gru djuê ana, mâo 3 klei duê mâo bi lar hlăm hdruôm hră mơ̆ng êpul hgŭm čih klei yăl dliê hlăm wưng anei”.

Ăt hlăm wưng anei, ti sang dlăng hră čar Daklak mkŏ mjing hdră rang mdah  hră “Ƀuôn mbruă knhuah gru đưm Việt Nam” mơ̆ng Helena Vân. Hdruôm hră mâo bi mklin 150 pŏk rup kơ dŭm ƀuôn bruă hlăm 3 kwar Dưr – krah – dhŭng. Mâo čih hŏng dua klei blŭ Việt Nam – Angle. Pô mă rup Helena Vân brei thâo, mơ̆ng hdruôm hră anei, ñu čiăng djă pioh kơ klei yăl dliê mơ̆ng ƀuôn bruă hŏng klei mngač, hŏng êa mil:

 “Mơ̆ng lu mta rup mâo mă hlăm dŭm boh ƀuôn bruă mdê mdê, kâo bi mklin lehanăn hrŏng ruah rup jăk hĭn mơ̆ng dŭm boh ƀuôn anăn jing dŭm boh ƀuôn bruă hlăk dơ̆ng ram luič, ƀiă snăk gŏ sang dôk djă pioh. Kâo čang hmăng srăng lŏ bi lar hdruôm hră anei lehanăn mđup brei kơ dŭm boh sang dlăng hră knŭk kna, anôk dlăng hră dŭm boh čar pioh kơ jih jang mnuih mâo dlăng hră anei, mañ dlăng kñăm lŏ kơrŭ wĭt ƀuôn bruă, lehanăn čang hmăng lu mnuih lŏ bi lar kơ pô mkăn dlăng čiăng thâo kơ ƀuôn bruă hlăk dơ̆ng luič ram”./.