Leh bi mŭt mbĭt, čar Dak Lak mâo sa wăl anôk hiu čhưn ênguê mdê hjăn – anôk krĭng čư̆ dliê Lăn dap kngư bi tuôm hŏng krĭng ksĭ prŏng. Hlăm anăn, čư̆ dliê Lăn dap kngư jing klei bi êdah mơ̆ng ai hdĭp kjăp ktang, bi mguôp mơ̆ng lu knhuah dhar kreh dŭm djuê ana, snăn krĭng hang ksĭ nah Ngŏ jing sa wăl anôk mčhĭt mơuăt, hlai mbĭt mơ̆ng krĭng êa ksĭ prŏng liă lia. Năng mđing, mơ̆ng krĭng čư̆ dliê truh kơ krĭng ksĭ mơ̆ng Dak Lak mâo sa tur knơ̆ng jing wăl anôk čư̆ pui – lăn hrah bazan, hrăm mbĭt hŏng wăl anôk dhar kreh čing čhar lehanăn Klei mmuñ chòi Dhŭng kwar krah. Hlăm wưng êgao, ti Dak Lak mkŏ mjing leh lu hdră hiu čhưn ênguê, msĕ si: Mkŏ mjing êpul famtrip tui ksiêm kơ hdră hiu čhưn ênguê lehanăn atăt tuê hiu čhưn, bruă klei mrâo, KOLs, KOCs; Klei bi kƀĭn tĭng dlăng boh tŭ hdră hiu čhưn “Dak Lak – Wĭt ti krĭng lăn knhuah gru”, mkŏ mjing Knăm mơak bruă mnia mblei – hiu čhưn ênguê, OCOP lehanăn mnơ̆ng jăk alŭ wăl; Ênhiang mmuñ – DJ – hlăp mgưt mkăp kơ tuê hiu čhưn…

Lê Phúc Long, K’iăng khua knơ̆ng bruă dhar kreh mjuăt asei mlei lehanăn hiu čhưn ênguê čar Daklak brei thâo:

“Tue truh hŏng čar daklak nah yŭ srăng lông ƀơ̆ng huă, nao hmư̆ klei tông čing čhar, lehanăn hmei srăng mâo dŭm hdră anăn pioh kơ bruă hiu čhưn ênguê, msĕ si klei tông čing, mgăl čing. Bi tĭng nah ngŏ čar mâo dŭm Bài chòi snăn hmei mkŏ mjing dŭm tour Bài chòi. Snăn dưi atăt tue hiu dlăng čhưn dhing djăp mta, mâo muiñ, mâo čŭt hơô kdrăp djuê ana, ba yua kdrăp mă bruă mơ̆ng djuê ana anăn, snăn ngă kơ tue khăp snăk.”

Hlăm hrue kăm pŏk dŭm bruă hiu čhưn ênguê čar Daklak thŭn 2026, mnuih ƀuôn sang lehanăn phung tue mâo mđrăm hlăm hdră kdŏ muiñ. Cao Hữu Nhạc ti ƀuôn hgŭm Tuy Hòa, čar Daklak bi êdah klei đăo knang kơ bruă mđĭ kyar hiu čhưn ênguê hlăm alŭ wăl.

 “Mơak êdi ƀuh jih jang klei kdŏ muiñ ti lăn dap kngư hlŏng truh kơ krĭng dap mnai hang ksĭ, leh klei bi mŭt mbĭt mâo klei jăk găl hĭn. Anei jing wưng găl lŏ pŏk mlar, bi hgŭm plah wah dŭm krĭng, mơ̆ng lăn dap kngư truh kơ krĭng ktue hang ksĭ, jing jăk yơh pioh kơ bruă hiu čhưn ênguê.”

Tui si knơ̆ng bruă dhar kreh, mjuăt asei mlei, hiu čhưn ênguê čar Daklak, leh pŏk mlar anôk kơ klei mđĭ kyar, bruă hiu čhưn ênguê alŭ wăl mâo leh lu hdră mkŏ mjing bruă hiu čhưn ênguê mơ̆ng čư̆ čhiăng trŭn kơ hang ksĭ. Anei jing atur yuôm bhăn mkŏ mjing lu mta kơ bruă hiu čhưn ênguê, mđĭ klei dưi bi ktưn hlăm dŭm anôk truh. Thŭn  2025, Daklak mâo drông leh êbeh 7,3 êklăk gưl čô tue, đĭ êbeh 31% mkă hŏng wưng anei thŭn dih. Hjăn hlăm 3 mlan akŏ thŭn 2026, kluôm čar mâo drông truh 2,3 êklăk gưl čô tue, mâo ba wĭt mơ̆ng bruă hiu čhưn ênguê êbeh 4.100 êklai prăk, lŏ dơng mâo nanao klei đĭ kyar jăk.

Čar hlăk dôk tă êlan kơ bruă hiu čhưn ênguê srăng jing bruă duh mkra phŭn, ƀrư̆ ƀrư̆ mkŏ mjing anăn knăl “Daklak – wĭt kơ krĭng knhuah gru” jing anôk jăk kơ phung tue hlăm ala čar lehanăn tue mơ̆ng ala tač êngao truh. Mơ̆ng ênai čing kwang bŏ hlăm čư̆ čhiăng, mbĭt hŏng Bài chòi mơak mñai hlăm krĭng êa ksĭ, snăn Daklak bŏ hŏng knhuah gru, klei hdĭp mjhĭt m’uăt dưi iêo jak. Mơ̆ng klei thâo bi mguôp anăn yơh mjing leh klei jăk mdê bi krĭng dưi ktŭng ba phung tue lông nao dlăng, lông ƀơ̆ng, lông hdĭp hlăm dhar kreh anăn bŏ hŏng ai hdĭp jăk yâo./.