Hdră ksiêm dlăng mkŏ mjing mơ̆ng hrue 1 - 4/4, mâo phung duh mkra, anôk bruă hâo hưn, lehanăn lu phung truăn kơ bruă, phung hiang ang, phung ngă bruă ktrâo atăt hiu čhưn nguê hlăm ala čar lehanăn mơ̆ng ala tač êngao nao bi mguôp mbĭt. Êpul mâo nao ksiêm leh hlăm dŭm anôk, ƀuh dŭm mta mnơ̆ng kơ bruă hiu čhưn ênguê nao mđrĭng mbĭt hŏng dhar kreh dliê kmrơ̆ng, lehanăn dŭm knhuah gru ti čar daklak, mơ̆ng anăn thâo mkă tĭng hnơ̆ng tŭ kơ bruă ngă, anôk ala lehanăn klei dưi hlăm bruă mkŏ mjing dŭm tour, êlan hiu čhưn ênguê. Mâo lu klei blŭ bi lač, čiăng mâo dưn yua jih klei tŭ dưn klei găl kơ bruă hiu čhưn ênguê. Čar Daklak lŏ dơ̆ng bi leh bruă nah gŭ, mđĭ hnơ̆ng kjăp klei thâo mă bruă, mđĭ bi lar mnơ̆ng dhơ̆ng jiă hlue knhuah mdê bi krĭng, lehanăn mđĭ hĭn klei hưn mdah kơ bruă hiu čhưn ênguê. Trần Hữu Phước, khua knơ̆ng bruă THP Travel Tour & Caravan Center, ti Quảng Trị lač:

Ară anei êlan hiu čhưn ênguê ti lăn dap kngư, lehanăn dŭm čar kwar krah ktuê hang ksĭ hlăk dôk ka jăk ôh. Tui si kâo mĭn năng lŏ čuăl mkă, lehanăn mkra mđĭ êlan klông bi jăk hĭn. Tơdah leh mâo mkra dŭm kdrêč elan anei, kâo mĭn dŭm êpul caravan mkŏ Daklak, dŭm čar krĭng lăn dap kngư̆ hŏng lehanăn ktuê hang ksĭ kwar krah, yap mbĭt hŏng Đà Nẵng truh kơ Quảng Trị srăng mjing sa hdră kơ bruă hiu čhưn ênguê jăk hŏng Caravan”.

Lu phung bi ala lač, Daklak năng bi dưn yua jih klei găl  pioh mjing kơ bruă hiu čhưn ênguê mrâo, jiă knhuah hjăn mơ̆ng pô, boh nik mđĭ ai klei lông ngă hlăm bruă hiu čhưn ênguê êjai mlam, klei jưh mdei hlăm alŭ wăl. Mbĭt hŏng anăn, Daklak lŏ mđĭ hĭn bruă hâo hưn, lehanăn mkŏ mjing dŭm klei hiu čhưn ênguê hlăm ala čar lehanăn hŏng ala tač êngao, mjing klei iêo jăk jăk tuê mơ̆ng ala tač êngao truh hŏng alŭ wăl.

Tui si knơ̆ng bruă dhar kreh, mjuăt asie mlei lehanăn hiu čhưn ênguê čar Daklak, leh pŏk phai anôk hiu čhưn ênguê, bruă hiu čhưn ênguê hlăm alŭ wăl mâo leh lu klei găl mđĭ kyar dŭm hdră hiu čhưn ênguê mâo klei bi mguôp plah wah krĭng čư̆ čhiăng hŏng krĭng dăp mnai hang ksĭ. Hjăn hlăm 3 mlan akŏ thŭn  2026, kluôm čar mâo hlăm brô 2,3 êklăk gưl čô tue truh, mâo ba wĭt truh êbeh   4.100 êklai prăk, lŏ dơ̆ng krơ̆ng klei mđĭ kyar jăk. Lê Phúc Long, K’iăng khua knơ̆ng bruă dhar kreh, hiu čhưn ênguê čar Daklak brei thâo, čar hlăk tă êlan kơ bruă hiu čhưn ênguê jing bruă duh mkra phŭn, ƀrư̆ ƀrư̆ mkŏ mjing anăn knăl “Daklak – Wĭt kơ krĭng knhuah gru” jing anôk truh jăk hŏng tue hiu čhưn ênguê hlăm ala čar lehanăn mơ̆ng ala tač êngao.

“Klei bi kƀĭn tal anei srăng đru kơ bruă dhar kreh, mjuăt asei mlei lehanăn hiu čhưn ênguê kơ lu mta klei, dơ̆ng mơ̆ng klei bhiăn hdră êlan, truh kơ bruă mđĭ kyar mnơ̆ng kơ bruă hiu čhưn ênguê, ta êlan kơ klei hâo hưn, mkŏ mjing dŭm klei bi tuôm, bi kƀĭn, lehanăn bi trông si srang dưi ngă čiăng dưi iIo jak lu tue truh hŏng čar Daklak, dưn yua jih klei găl mơng ngăn dŏ, lehanăn klei jing sĭt ară anei ti Daklak.”