Mơ̆ng dŭm ênuk hŏng anei, grăp thŭn mnuih ƀuôn sang Chăm phung đăo Islam Bà Ni lŏ mkŏ mjing knăm Kareh – Katal, jing knăm hriê kơ prŏng amâodah lŏ pia jing mă tŭ klei đăo kơ anak mniê amâodah anak êkei mơ̆ng 15 thŭn. Anei jing sa hlăm dŭm hdră bhiăn yuôm bhăn hlăm klei hdĭp mnuih Chăm đăo Islam Ba Ni

Knăm Kareh - Katal kreh mkŏ mjing lăm 3 hruê. Hruê tal 1, grăp čô hlăm gŏ sang mprăp kdrăp čŭt hơô, mdơ̆ng pưk. Hruê tal 1, diñu mprăp mnơ̆ng ngă yan msĕ si: mtei, đĭo, bêñ ít, bêñ xalam…Leh anăn klei ngă yang mkŏ mjing hlăm hruê tal 3.

Wưng anei, pô sang srăng iêo jak mnuih ƀuôn sang hlăm ƀuôn čiăng ktuê dlăng mmông anak êkei, anak mniê mâo yang tŭ yap jing pô prŏng leh. Hluê si klei găl gŏ sang mdê mdê dưi mkŏ mjing điêt amâodah prŏng. Yăng đar gŏ sang srăng mprăp kơ grăp čô sa ksir mtei, sa čhiên đĭo leh anăn sa drei mnŭ knô čiăng myơr kơ yang.

Hluê si sa čô khua kiă klei đăo ti alŭ Bình Thắn, să Bắc Bình, čar Lâm Đồng, êlâo kơ ngă yang phŭn, srăng ngă knăm Mbang Aluah, jing klei blŭ hrăm hŏng Pô Nabi - pô yang thâo hruê anei gŏ sang mâo klei ngă yang hriê kơ prŏng kơ anak čô.

Mmông yang hruê lĕ, phung êdam êra bi kƀĭn ti anôk ngă yang. Êkei mâo sa čô khua kiă pia jing Imem mtô brei nao dôk hlăm pưk. Mniê srăng mâo Amuk Buh mtô nao dôk hlăm pưk mkăn. Truh kơ aguah mgi, êjai yang hruê mrâo blĕ, phung mă ƀuê kơ phung êdam êra anăn mtô brei digơ̆ nao mnei ti êa krông. Anei jing bruă yuôm bhăn hlăm klei ngă yang hriê kơ prŏng.

Hluê si mnuih Chăm, êa krông srăng rao jih klei čhŏ, klei soh leh anăn ba wĭt klei doh kơ anak mnuih. Truh hŏng hnoh krông jing hdơr kơ phung agha. Hưn hŏng lăn adiê truh leh mmông hriê kơ prŏng mơ̆ng sa klei hdĭp mnuih.

Leh mnei ti êa krông, phung êdam êra dưi ba wĭt ti anôk ngă yang phŭn. Tinei, phung khua ngă yang klă klơ̆ng bi anăn kơ phung prŏng hlăm gưl anei. Anăn srăng mă mơ̆ng anăn phung yang mă ƀuê. Anăn anăn yơh srăng djă yua jih klei hdĭp, truh kơ mmông đuĕ nao.

Leh anăn jing klei ngă yang hŏng phung êkei. Êlâo dih hdră bhiăn anei dưi ngă djŏ msĕ hŏng anăn pia ñu. Bi ară anei knŏng dưi ngă bi hmô mă đuč.

Bi hŏng mniê srăng ngă hdră bhiăn khăt ƀŭk anăp čiăng kat asei amâo mâo ngă soh hlăm klei đăo.

Hlăm knăm ngă yang, sa čô pŭ sa čô hđeh hlăm brô 8 mlan truh kơ 1 thŭn jing anak čô hlăm gŏ sang amâodah hlăm găp djuê čiăng ngă knăm leh anăn pia anei jing Po La Dhi mŭt ngă yang.

Hlăk mblang kơ hdră bhiăn anei, Imem Kết ti alŭ Bình Thắng, să Bắc Bình, čar Lâm Đồng brei thâo: kyua grăp čô hlăm tian amĭ sơăi leh anăn kơh kơkiêng. Kyuanăn anăn hlăm pưk phŭn, êlâo hĭn srăng ngă yang kơ hđeh anei, leh anăn kơh jing anak pô sang:

“Srăng mâo hđeh anei, kyuadah hdră bhiăn mơ̆ng aduôn aê pô đưm leh. Hđeh anei jing hđeh êkei, amâodưi ôh hđeh mniê, mơ̆ng 7 -8 mlan. Srăng čŭt hơô kơ hđeh anei djŏ hŏng hdră bhiăn klei đăo. Yăng đar kreh duah hđeh hlăm găp djuê, tơdah amâo mâo kơh srăng nao duah hđeh djuê mkăn”.

Khădah ăt dôk mâo dŭm hdră bhiăn đưm hlăm klei ngă yang Kareh - Katal, ƀiădah, mkă hŏng êlâo dih mâo klei đĭ kyar hĭn, boh nik jing bi hrŏ mmông ngă yang.

Lư Văn Xuống, sa čô khua thŭn ti să Bắc Bình, čar Lâm Đồng brei thâo:

“Êlâo dih, phung nao hgŭm ngă knăm Kareh - Katal anei srăng nao sač êa mă kan, nao hlăm dliê mprăp mnơ̆ng ngă yang. Leh anăn bi ruê̆ hdră bhiăn anei phung anei ăt dôk đru kơ pô sang mơ̆ng 7 - 10 hruê. Mơ̆ng mmông kčưm klei ngă yang truh kơ mmông ruê̆ ăt truh giăm krah mlan, ƀiădah ară anei bi hrŏ knŏng adôk mă 3 hruê, ară anei đĭ kyar hĭn leh.”

Ruê̆ klei ngă, phung nao hgŭm srăng bi huă ƀơ̆ng. Phung mniê, phung êkei hlăm knăm hriê kơ prŏng srăng mâo mnuih ƀuôn sang, găp djuê brei mnơ̆ng mơak. Sơnăn, yap mơ̆ng nei, phung mniê, phung êkei anei klă klơ̆ng jing phung đăo Islam Bà Ni leh anăn jing sa čô klă klơ̆ng hlăm găp djuê./.