Hlăm klei blŭ hrăm, phung mă bruă hưn kơ hdră truh kơ bruă hiu mă bruă leh anăn klei găl bi mguôp hŏng dhar kreh dŭm djuê ana. Lu klei blu lač, kyua klei lu jơr hlăm klei hdĭp, hdră bhiăn, klei mưn leh anăn klei êlam hlăm dhar kreh mkŏ mjing leh klei iêo jăk kjăp kơ pô mă rup.

Hluê si pô mă rup Nguyễn Xuân Chính, ti Hà Nội, čiăng dưi mâo dŭm pŏk rup siam, pô mă rup srăng mâo mmông ksiêm hriăm, hdĭp mbĭt hŏng pô anăn leh anăn mpŭ kơ knhuah dhar kreh grăp djuê ana, grăp krĭng kwar.

“Anei jing sa klei dleh, dleh mă rup. Leh anăn êlâo kơ mă rup pô săng ksiêm hriăm, srăng dlăng klă čiăng thâo săng hĭn kơ knhuah gru, klei bhiăn mơ̆ng djuê ana anăn čiăng si srăng ngă pô dưi mă rup, thâo klă kơ anak mnuih, leh anăn srăng bi mni kơ klei yuôm mơ̆ng grăp djuê ana”.

Phung mă rup ăt hưn dŭm klei dleh dlan êjai nao ti krĭng taih kbưi, klei dleh kơ boh blŭ, bi tuôm hŏng phung anăn. Ƀiădah, kyua dŭm klei lông dlăng anei čiăng kơ phung mă bruă srăng mâo klei gĭr, mbruă leh anăn mâo bruă klam hŏng grăp pŏk rup pô mă.

Mơ̆ng boh sĭt klei mă rup, phung mă rup nao êlam kơ dhar kreh, klei hdĭp, hluê anăn đru bi lar knhuah dhar kreh dŭm djuê ana hlăm klei hdĭp ară anei, lŏ pŏk thiăm dŭm êlan nao mrâo hlăm klei mă rup.

Pô mă rup Vũ Duy Thương, ti ƀuôn hgŭm Tân Lập, čar Dak Lak brei thâo:

Hŏng dŭm klei kah mbha anăn mtô kơ pô srăng ngă bruă čiăng ƀiă luč liê hĭn, nao êlam hĭn kơ dhar kreh, hƀuê ênuk, klă sĭt, msĕ si dŭm klei blŭ mguôp leh, drei amâodưi mkŏ mjing soh hŏng klei sĭt, gĭr mpŭ kơ klei sĭt, djă pioh knhuah dhar kreh ƀiădah srăng jing sĭt, klei anăn yuôm bhăn hĭn. Anăn jing hdră tă kơ phung nao êdei čiăng kơ diñu srăng kluôm dhuôm hĭn, ngă jăk hĭn leh anăn bi lar jih jang boh tŭ dưn mơ̆ng klei mă bruă, mđĭ kơhưm klei anei hĭn”.