Êbeh 15 thŭn tŭk knă mnơ̆ng ƀơ̆ng ti dŭm anôk čhĭ mnơ̆ng ƀơ̆ng hing ang ti Quy Nhơn, ayŏng Huỳnh Tấn Dũng, anôk čhĭ mnơ̆ng ƀơ̆ng huă hŏ sang “Rừng nướng” ti ƀuôn hgŭm Quy Nhơn mâo nanao klei khăp mơai hŏng mnơ̆ng ƀơ̆ng huă Lăn dap kngư. Ayŏng Dũng brei thâo: Tuê hiu čhưn truh ti Quy Nhơn, Gia Lai khăp êdi ƀơ̆ng mnơ̆ng krĭng čư̆ čhiăng, msĕ si čĭm bê, êmô amâo dah mnŭ, ŭn ăm.

 “Kâo pô ăt čiăng mđĭ kyar dŭm mta mnơ̆ng jăk ti krĭng ƀuôn sang pô dôk mâo. Kâo mkra mnơ̆ng ƀơ̆ng čiăng ba mơĭt áăp hưn mthâo truh kơ di amai adei, amĭ nah aprŏng jing čiăng mđĭ kyar mnơ̆ng ƀơ̆ng huă pô, čiăng bi mguôp, ba yua dŭm mta mnơ̆ng bi ƀăt mâo ti alŭ wăl pô ăt msĕ mơh ti Việt Nam drei, čiăng kơ tuê hiu čhưn tơdah truh ti Việt Nam, hlăm anăn mâo čar Gia Lai, ƀuôn prŏng ksĭ srăng dưi ƀơ̆ng dŭm mta mnơ̆ng jiă mnâo mnañ jăk Việt Nam pô.

Bọ biển hŭl lehanăn tiết canh Bọ biển, kan Chình ăm, lẩu hdang, Hàu êa ksĭ ăm dưm phô mai, djam  kan dìa êa ksĭ… jing dŭm mta mnơ̆ng jiă mnâo mnañ krĭng ksĭ, maoa phung tŭk knă ti Quy Nhơn mdưm hlăm anăn dŭm mta mnơ̆ng ƀơ̆ng mkăp kơ tuê hiu čhưn hlăm thŭn hiu čhưn ênguê ala čar - Gia Lai 2026. Truh ti Quy Nhơn hiu čhưn ênguê lehanăn tui ksiêm hlăm thŭn hiu čhưn ênguê ala čar 2026, ayŏng Trần Nhật Đông, tuê hiu čhưn mơ̆ng Hồ Chí Minh brei thâo:

 “ Mnơ̆ng ƀơ̆ng Quy Nhơn mâo lu mta, êngao kơ mnơ̆ng mă mơ̆ng êa ksĭ snăn kâo pô ăt dưi ƀơ̆ng dŭm mta mnơ̆ng jiă mnâo mnañ čư̆ dliê lăn dap kngư msĕ si mnơ̆ng ăm. Mnâo gơ̆ jăk, guôp mơh hŏng mnuih kwar Dưr lehanăn kwar Dhŭng. Kâo buh msĕ si dôk ƀơ̆ng huă ti sang anăn.

Nguyễn Thị Kim Chung, kơiăng khua knơ̆ng bruă dhar kreh, mjuăt ktang asei mlei lehanăn hiu čhưn ênguê čar Gia Lai hưn, hlăk Gia Lai jing anôk truh yuôm bhăn hlăm hdră Thŭn hiu čhưn ênguê ala čar 2026, anôk bruă tŭ knă mnơ̆ng ƀơ̆ng huă alŭ wăl dôk mâo dum knhuang nao klă sĭt. Dŭm anôk tŭk knă, čhĭ mnơ̆ng ƀơ̆ng dôk mđĭ klei thâo săng, klei đua klam hlăm hdră mnia mblei, mđing truh kơ hdră mkŏ mjing pŏk rup hiu čhưn ênguê jĕ giăm, kreh dhar.

 “Hlăm hruê kăm thŭn hiu čhưn ênguê ala čar, dŭm êpul êya ngă bruă hiu čhưn ênguê ti alŭ wăl čar mâo leh klei tĭng dlăng pral čiăng mssĭ boh tŭ hdră ngă bruă lehanăn mđing kơ anôk bruă nah gŭ, kdrăp mnơ̆ng, êpul mnuih mă bruă čiăng mkăp kơ tuê hiu čhưn ênguê. Dŭm êpul êya mđing kơ bruă bi lu jơr mnơ̆ng dhơ̆ng boh nik kơ mnơ̆ng ƀơ̆ng huă, jiă knhuah alŭ wăl. Mđĭ hdră mtô mblang, hưn mthâo kơ thŭn hiu čhưn ênguê ala čar truh kơ phung tuê hiu čhưn kơ hdră bruă hlăm knăm anei”.