Mơ̆ng hruê 11 truh hruê 13/4/2026 kơ anăp ti Quảng Ninh srăng mkŏ mjing Klei bi lông hdră mđung asăp kluôm ala tal 17 - Quảng Ninh 2026 hŏng akŏ “Mđung asăp kyua Việt Nam jhŏng ktang, mdrŏng sah”. Anei jing klei hâo hưn ba mdah hlăm klei bi kƀĭn hŏng bruă klei mrâo hâo hưn kơ Klei bi lông hdră mđung asăp kluôm ala tal 17 mâo Sang mđung asăp blŭ Việt Nam (VOV) bi hgŭm hŏng Knơ̆ng bruă sang čư̆ êa čar Quảng Ninh mkŏ mjing tlam 30/3 ti Anôk bruă mđung asăp ala čar 58 Quán Sứ Hà Nội. 

Hlue si K’iăng Khua Sang mđung asăp blŭ Việt Nam Phạm Mạnh Hùng, klei mñă mơ̆ng Klei bi lông thŭn anei jing gưl tal êlâo mkŏ mjing klei bi trông lu ala čar kơ podcast, mâo 35 čô thơ̆ng kơ bruă leh anăn lu êpul thơ̆ng kơ bruă ala tač êngao. Boh nik, Klei bi lông ăt gưl tal êlâo iêô phung ksiêm dlăng ala tač êngao hgŭm brei puăng kơ podcast. Klei anei bi êdah ƀrư̆ hruê ƀrư̆ klă kơ Podcast, lač kơ klei đĭ kyar mrâo mơ̆ng klei mrâo asăp blŭ hlăm ênuk hâo hưn lu tur knơ̆ng. Hlăm jar Klei bi lông hdră mđung asăp blŭ kluôm ala tal 17 mkŏ mjing lu bruă ngă: Klei bi trông lu ala čar: "Podcast - Hdră mrâo mbruă kơ klei mđung asăp hlăm ênuk mrô”; Klei bi trông thơ̆ng: “Mđung asăp ti mmông anăn mtam hlăm ênuk mrô - Klei thâo mâo lu mnuih hmư̆”; Knăm mjưh ruĕ leh anăn mđup brei klei pah mni Klei bi lông hdră mđung asăp blŭ kluôm ala tal 17.