Nao čuă anôk čhĭ mnơ̆ng pơ̆k mñam Mara hlăm knhal jih hruê kăm, hmei ƀuh klă ai êwa dôk ngă bruă mčhĭt mơuăt mơ̆ng ênai maĭ kčoh, kdrăp pơ̆k mñam kwang msĕ si ênai dhaui juăt mưng leh mơ̆ng ƀuôn sang.

Amâo mâo adŭ bi hriăm thơ̆ng kơ bruă, Amai H’Loang Mlô, kkiêng thŭn 1996, mphŭn ktuê êlan anei hŏng klei gĭr ktưn mơ̆ng pô. Mbĭt hŏng bruă krơ̆ng kjăp bruă djuê ana đưm, amai lŏ ba klei mlih mrâo, bi mrâo mrang kdrăp pơ̆k mñam jing mơiêng ao nao hiu čhưn, mơiêng ƀar hruê bi kuôl, ao mđao amâo dah dŭm mta mnơ̆ng djă, ƀar mƀt. Khădah dưi mkra hluê si klei čiăng mơ̆ng mdê bi pô, amai ăt gĭr krơ̆ng kjăp gru grua, mnga lehanăn êa mil msĕ hđăp, čiăng kơ grăp mta mnơ̆ng gơ̆ mrâo mrang ƀiădah ăt jiă knhuah dhar kreh, boh tŭ yuôm mơ̆ng djuê ana pô. Amai H’Loang Mlô brei thâo: “Dŭm hruê tal êlâo mphŭn čô̆ kơ bruă, kâo tlă anăp hŏng lu mơh klei dleh dlan, boh nik klei kơ ngăn prăk. Djŏ mmông kâo mĭn amâo dưi ngă ôh, ƀiădah kyua mâo dŭm klei thâo kơ hdră čhĭ mnơ̆ng online lehanăn klei đăo knang, sa ai, đru mơ̆ng dĭ amai, di prŏng kâo mâo leh kdrŭt dưi hgao, kpưn đĭ kbưi hĭn. Ƀrư̆ ƀrư̆, kâo ăt dưi mdơ̆ng lehanăn mđĭ kyar. Truh ară anei, anôk bruă mâo 7 čô mă bryă phŭn, mâo 60 čô đru mbĭt, mbĭt hŏng 8 anôk tă kčoh, 8 anôk pơ̆k mñam lehanăn 3 anôk mkăp mnal. Grăp čô mâo hnư hrui wĭt mơ̆ng 3,5 êklăk truh 10 êklăk prăk grăp mlan”.

Mbĭt hŏng hdră mđĭ kyar bryă mkra, mnia mblei, amai H’Loang Mlô lŏ mjing bruă mă, đru kơ lu mnuih dleh dlan hlăm êpul êya. Adei H Lagi Mlô dôk hriăm thŭn tal 2 Sang hră gưl prŏng Lăn dap kngư. Kyua klei đru mơ̆ng amai H’Loang Mlô, adei dưi hgao klei dleh dlan lŏ gĭr hlăm klei hriăm hră. “Kâo lač jăk êdi kơ amai H’Loang hrăm mbĭt, đru leh kơ kâo.

Mơ̆ng leh mŭt mă bruă tinei, kâo dưi thâo săng klei yuôm mơ̆ng kdrăp čŭt hơô mnuih Êđê pô. Kâo ăt thâo săng hĭn kơ gru grua, mna di amĭ nah prŏng mñam, gơ̆ siam êdi. Êngao anăn, kâo ăt mâo prăk hrui wĭt mđing kơ klei hriăm hră mơ̆ng pô, msir mghaih bruă, klei kơ êdeh êdâo, anôk dôk, mơ̆ng anăn hơĭt ai tiê hriăm hră. Kâo čang hnăng, hlăm êdei anăp srăng mâo lu mnuih thâo lehanăn khăp kơ mnơ̆ng pơ̆k mñam mơ̆ng mnuih Êđê pô hĭn.

Kơ gru grua, mnga siam, êa mil jăk lehanăn jiă knhuah dhar kreh, mnơ̆ng pơ̆k mñam Lăn dap kngư ƀrư̆ hruê ƀrư̆ jak iêu lu klei mđing dlăng mơ̆ng tuê ala tač êngao.

Ayŏng Donovan Fink, tuê hiu čhưn mơ̆ng Mi, brei thâo: “Kâo ƀuh siam êdi, čŭt hơô ƀuh jăk mơh, gru grua, mnga gơ̆ siam êdi, jăk ală dlăng. Kâo mơak dưi truh tinei čiăng tui ksiêm kdrăp anei. Kâo ƀuh mnơ̆ng pơ̆k mñam tinei jăk êdi yơh. Kâo ăt blei mơh ngă hnư mnơ̆ng brei kơ gŏ sang čiăng diñu thâo săng hĭn kơ knhuah dhar kreh anei.

Hlăm êdei anăp, amai H’Loang Mlô čang hmăng bruă pơ̆k mñam pô jing đĭ kyar hĭn, đru kơ lu mnuih hlăm êpul êya dưi mâo bruă mă lehanăn hnư hrui wĭt hơĭt kjăp. Amai čang hmăng dưi ba mnơ̆ng anei truh hŏng ƀĭng găp hlăm lehanăn êngao ala čar, čiăng kơ boh tŭ yuôm dhar kreh Lăn dap kngư dưi lu mnuih thâo lehanăn mpŭ. “Kâo čang hmăng mđĭ kyar bruă pơ̆k mñam mnơ̆ng mơ̆ng djuê ana pô, bi mguôp hŏng phung mbruă di amĭ nah prŏng, amai adei čiăng kriê pioh lehanăn lar bra boh tŭ yuôm. Mta kñăm mơ̆ng kâo jing mjing bruă pơ̆k mñam mnơ̆ng djuê ana jing sa bruă phŭn, đru kơ phung mbruă mâo hnư hrui wĭt mbĭt anăn ba mnơ̆ng pơ̆k mñam amâo djŏ knŏng hưn mthâo hlăm ala čar ƀiădah truh hŏng ƀĭng găp tar rŏng lăn.

Ti krah klei hdĭp ênuk mrâo, phung mda asei msĕ si amai H’Loang Mlô dôk krơ̆ng kjăp bruă pơ̆k mñam mnơ̆ng djuê ana. Hŏng hŏng klei mĭn mrâo, gĭr lehanăn klei čang hmăng lar bra dhar kreh, đăo knang hlăm êdei anăp, mnơ̆ng pơ̆k mñam Êđê srăng mñă klă kơhưm, jing kdrông mkŏ ba boh tŭ yuôm djuê ana hơĭt kjăp mbĭt hŏng ktue êlan ênuk mrâo./.