3 mlan akŏ thŭn, tue hiu čhưn hriê ti Gia Lai mâo giăm 65.000 gưl, đĭ 72%; tue  hlăm ala čar mâo êbeh 4,1 êklăk gưl, đĭ giăm 14%. Ênoh hrui mơ̆ng hiu čhưn ênguê hlăm 3 mlan mâo hlăm brô 8.700 êklai prăk, đĭ 17% mkă hŏng wưng anei thŭn êlâo. Hjăn hlăm mlan 3, hnơ̆ng tue leh anăn ênoh hrui mă mâo mkrah wah hŏng êbeh 2 êklăk gưl leh anăn ênoh hrui mă giăm 4000 êklai prăk.

Klei mñă năng mđing jing Hruê kăm mphŭn pŏk thŭn hiu čhưn ênguê ala čar Gia Lai 2026 mkŏ mjing mơ̆ng hruê 23 truh hruê 30/3 hŏng lu bruă mâo hnơ̆ng prŏng msĕ si Klei bi kƀĭn hiu čhưn ênguê Gia Lai 2026, Klei bi kƀĭn mtrŭt mjhar bi liê leh anăn drông kŭm păn hiu čhưn ênguê lu ala čar truh ti kdrŭn ksĭ Quy Nhơn. Hlăm gưl II thŭn 2026, čar Gia Lai lŏ dơ̆ng mđĭ ktang bruă hiu čhưn ênguê hŏng lu bruă msĕ si: Knăm mơak dhar kreh dŭm djuê an čar tal V; Klei bo lông mjuăt asei mlei dŭm djuê ƀiă; Knăm mơak Hiu čhưn ênguê yan mdei prŏng “Gia Lai – Anôk  truh jăk siam”; hŏng dŭm hdră hưn mdah anôk truh ti ala tač êngao leh anăn mnơ̆ng dhơ̆ng  mdê hjăn msĕ si “Čing čhar knhal jih hruê kăm -dlăng leh anăn lông ngă”. Mơ̆ng hdră mkŏ mjing bruă hnơ̆ng prŏng anei, čar Gia Lai čang hmăng mjing klei mñă jăk hŏng tue hiu čhưn hlăm ala čar leh anăn ala tač êngao.