Ti Ƀuôn Ama Thuôt, kphê jing leh knhuah dhar kreh jăk siam bi mguôp anak mnuih. Phạm Thị Thanh Nga, sa čô mnuih hlăm ƀuôn prŏng Ƀuôn Ama Thuôt, yăl dliê mnuih ƀuôn sang tinei mnăm kphê čiăng kčưm kơ sa hrue mrâo:

 “Hŏng mnuih ƀuôn sang ti Ƀuôn Ama Thuôt snăn kphê jing mnơ̆ng mnăm jăk êdi. Mnăm kphê amâo mâo djŏ knŏng jing klei mưng, ƀiădah lŏ jing anôk bi mguôp, tinăn bi trông kơ klei duh ƀơ̆ng, boh nik mâo klei bi yăl dliê bi mđĭ ai hdơ̆ng găp. Kphê hŏng pô jing leh mnơ̆ng mnăm mưng juăt hlăm grăp hrue, kƀah hĕ kphê amâo mâo jăk ôh”.

Amâo mâo djŏ knŏng jing klei mưng, kphê lŏ jing klei khăp, lehanăn atăt lu mnuih lŏ hdơr wĭt kơ phŭn agha. Êkei êdam anak Ê Đê – Y Pốt Niê, tuôm hriăm leh bruă nai mdrao, ƀiădah klei hdơr kơ kphê mơ̆ng amĭ ama ti ƀuôn, snăn ñu wĭt mkŏ mjing anăn knăl kphê Ê Đê. Ba yua hdră mkra mjing kphê mơ̆ng aê aduôn pô hđăp, ñu pia jing kphê săp pui đung hiu kbưi, amâo mâo djŏ knŏng jing klei yăl dliê kơ kphê ƀiădah lŏ jing klei yăl dliê kơ dhar kreh, kơ kngan mbruă, lehanăn klei kreh kruiñ mơ̆ng amĭ, mơ̆ng amai ti ƀuôn sang. Y Pốt Niê lač:

 “Mkŏ kơ dhar kreh, lehanăn tal dua tal dua jing ba kphê pô truh hŏng tar rŏng lăn, čang hmăng kơ kphê anei amâo mâo djŏ knŏng ti Việt Nam ƀiădah truh kơ tar rŏng lăn thâo, boh nik dhar kreh đuĕ nao mđrĭng mbĭt, bi êdah klei tŭ mơ̆ng klei thâo bi mguôp, jing klei tŭ dưn mơ̆ng dhar kreh mbĭt hŏng boh tŭ kơ hnơ̆ng jăk kphê.”

Bi mniê êra siam H’Hen Niê, kphê jing klei lŏ bi hdơr mơ̆ng ênuk hđeh, jing mnâo mnañ kơ ai tiê, amĭ kkiêng lehanăn đĭ hriê kơ prŏng hlăm sa boh ƀuôn ƀun ƀin ti kdriêk Čư̆ Mgar, mơ̆ng điêt mtam mưng juăt leh hŏng ana kphê. H’Hen, yăl dliê:

 “Tui si kâo ƀuh lehanăn thâo kơ kphê jing anôk bi mguôp, kphê jing klei khăp, kphê jing klei găl. Lač kơ kphê jing klei bi mguôp tal êlâo jing klei bi mguôp hlăm găp djuê. Kâo mnăm leh kphê mơ̆ng aduôn aê kâo kar. Grăp aguah ưm leh mnŭ kdjô̆, mâo mnuih kgŭ kuč pui tŭk êa kar kphê yơh tal êlâo jih jang mnuih hlăm sang bi mnăm. Kphê jing klei khăp, êjai dôk mnăm kphê msĕ snăn, lŏ kar ba kơ hma pioh mnăm, kphê lŏ jing klei khăp, tơdah ti anôk drei mnăm kphê, snăn ti năn drei lŏ hdơr yơh kơ sang pô, klei khăp kơ ƀuôn sang, klei khăp hŏng asăr kphê”.

Bi Niê Thanh Mai, Khua êpul hgŭm dhar kreh klei yăl dliê čar Daklak, dhar kreh kphê jing leh klei bi êwa, jing leh sa kdrêč amâo mâo dưi kƀah ôh hlăm klei hdĭp mnuih ƀuôn sang ti Ƀuôn Ama Thuôt.

 “Hŏng hmei kphê jing dhar kreh, kphê jing klei khăp, lehanăn mơ̆ng kphê mơh jing anôk bi mguôp. Hmei ƀuh hlăm grăp mơak kphê mâo nanao klei mđĭ ai mdê mdê, msĕ si hŏng thŭn anei, hmei ƀuh kphê yơh anôk bi mguôp dhar kreh hlăm ƀuôn sang, dhar kreh djăp djuê ana hlăm čar. Boh nik ñu lar hlăm djăp anôk mđrĭng hŏng klei bluh đĭ dhar kreh dŭm djuê ana hŏng kphê”.

Knăm mơak kphê Ƀuôn Ama Thuôt tal 9 thŭn 2025 ti Daklak hŏng akŏ "Ƀuôn Ama Thuôt – Anôk truh mơ̆ng kphê tar rŏng lăn”. Nguyễn Hồng Phúc, pô gai hdră mkŏ mjing knăm mơak kphê. Lač: Anei amâo mâo djŏ knŏng jing klei mpŭ mni kơ kphê đuič ôh, ƀiădah jing mmông găl hưn mdah kơ knhuah gru dhar kreh lăn dap kngư, anôk kphê mâo klei tŭ dưn thâo bi mguôp:

 “Mâo dua mta klei năng mđing hĭn anăn jing ai tiê mơ̆ng bruă kphê mguôp hŏng dhar kreh mơ̆ng 49 djuê ana ayŏng adei, anăn jing bi mguôp klei tŭ dưn anei amâo mâo ôh anôk mkăn dưi mâo msĕ si drei mpŭ mni kơ dhar kreh kphê jăk siam mơ̆ng mnuih djuê ƀiă, hlăm hdră djuê ana, lehanăn mâo bi êdah mơh klei kơ kphê hŏng klei hdĭp aguah tlam hlăm klei dôk dơ̆ng ƀơ̆ng huă.”

Ti krah klei hdĭp ênuk ară anei, mơ̆ng grăp tŏ kphê mơ̆ng Ƀuôn Ama Thuôt jiă mnâo mnañ mơ̆ng lăn dliê čư̆ čhiăng. Anăn jing klei yăl dliê kơ anak mnuih, kơ dhar kreh kơ klei thâo bi mguôp, thâo bi khăp./.