Knăm mơak Chrôi Rum Chếk dưi mkŏ mjing ti alŭ Cà Lăng A Biển, ƀuôn hgŭm mrô 2, wăl krah Vĩnh Châu, čar Sóc Trăng. Hluê si mnuih ƀuôn sang tinei, knăm mơak mâo leh mơ̆ng đưm, hlăm brô 300 thŭn hŏng anei. Knăm mơak anei mkŏ mjing hlăm hruê 14,15 mlan 2 hruê mlan blĕ grăp thŭn mâo boh tŭ akâo kơ lăn čar, mnuih ƀuôn sang êđăp ênang, angĭn hjan jăk siam. Anei ăt jing wưng čiăng kơ mnuih ƀuôn sang hdơr kơ phung mâo ai jah ênhă, mkŏ mjing krĭng lăn, lač jăk kơ yang brei leh kơ diñu klei hdĭp trei mđao, lač jăk kơ êa ksĭ brei lu kan hdang. Sơn Thol, Achar prŏng ti sang Yơng Sêrây Cro Săng, ƀuôn hgŭm mrô 2, wăl krah Vĩnh Châu, čar Sóc Trăng brei thâo:

Mnuih ƀuôn sang tinei lu jing knang kơ bruă mă kan hdang, kyuanăn mnuih ƀuôn sang ngă knăm akâo klei êđăp ênang grăp thŭn čiăng bi êdah klei lač jăk hŏng êa ksĭ đru kơ diñu mâo klei hdĭp trei mđao. Leh anăn knăm mơak anei dưi rơ̆ng grăp thŭn truh kơ ară anei.

Mphŭn pŏk knăm mơak jing klei wah lač kơ mnguh mngăt dưi mkŏ mjing hlăm lam čư̆ čuah čiăng hdơr kơ aduôn aê atâo tiết, lač jăk kơ êa ksĭ leh anăn hmăng hmưi dŭm klei jăk siam hĭn hŏng ƀuôn sang. Leh kơnăn jing knăm pŭ rup yơng mơ̆ng sang yơng Sêrây Cro Săng truh kơ anôk ngă knăm. Leh rup yơng dưi ba ti anôk ngă yang grăp čô srăng kkuh kơ hla čhiăm sgru Yơng, leh anăn pŭ rup yơng ba ti knưl. Leh anăn jing knăm tam bảo, akâo kơ lăn čar, mnuih ƀuôn sang êđăp ênang, wah lač leh anăn hlăk mblang mơ̆ng phung sư yơng klam ngă hŏng klei nao hgŭm mơ̆ng phung đăo yơng.

Leh knăm mâo knhuah jiă kma dhar kreh jing klei mơk hŏng lu klei hlăp lêñ mjuăt asei mlei, dhar kreh kdŏ mmuñ knhuah gru djuê ana. Dŭm klei hlăp lêñ lŏ bi êdah dŭm mta bruă mă mơ̆ng mnuih ƀuôn sang tinei čiăng duah ƀơ̆ng. Klei kdŏ mmuñ hlăm knăm mơak ăt iêo nao lu mnuih ƀuôn sang nao hgŭm. Anăn jing dŭm ênhiang kdŏ, klei mmuñ, ênhiang djuê ana mơ̆ng mnuih Khmer.

Dŭm thŭn giăm anei, mâo klei uêñ mĭn, klei gĭt gai mơ̆ng dŭm gưl, dŭm dhar bruă, knăm mơak Chrôi Rum Chếk amâo mâo mdei dưi bi hơĭt, mđĭ hnơ̆ng wăt mta phŭn, iêo jak lu mnuih ƀuôn sang nao hgŭm, mkŏ mjing klei bi mguôp, bi khăp đru hdơ̆ng pô plah wah tlâo djuê ana Yuăn – Khmer – Hoa dôk hdĭp ti krĭng lăn êa ksĭ anei, Achar Sơn Thol lŏ brei thâo:

Êlâo dih mkŏ mjing mă điêt, ƀiădah knăm mơak dưi rơ̆ng nanao. Dŭm thŭn êgao, mâo klei uêñ mĭn mơ̆ng Đảng, knŭk kna, bruă sang čư̆ êa alŭ wăl, knăm mơak dưi mkŏ mjing prŏng hĭn. Ară anei, ti êlan dơ̆ng, anôk mkŏ mjing knăm mơak, klei găl ngă dŭm hdră ăt jăk hĭn.

Thŭn anei, knăm mơak Chrôi Rum Chếk mơ̆ng mnuih Khmer ti Vĩnh Châu mâo Phŭn bruă dhar kreh, mjuăt asei mlei leh anăn hiu čhưn ênguê tu  yap jing mnơ̆ng kriê pioh amâo êdah klă mơ̆ng lăn čar. Anei jing klei hơ̆k mơak prŏng, jing klei čih yap kơ klei gĭr amâo mdei hlăm bruă kriê pioh leh anăn bi lar knhuah gru djuê ana Khmer ti Vĩnh Châu. Sơn Wath, sa čô hlăm êpul kriê dlăng sang yơng Sêrây Cro Săng hơ̆k mơak:

Phung đăo ti sang yơng Sêrây Cro Săng, mnuih ƀuôn sang tlâo djuê an jing hơ̆k mơak êdi, knăm mơak anei mâo mơ̆ng dŭm êtuh thŭn leh, ară anei jing mnơ̆ng kriê pioh amâo mâo êdah klă jing klei hơ̆k mơak êdi.

Trần Trí Vân, k’iăng khua bruă sang čư̆ êa wăl krah Vĩnh Châu, čar Sóc Trăng lŏ brei thâo:

Hmei srăng mđĭ hĭn bruă hâo hưn, mtô bi hriăm hlăm êpul êya, phung đăo yơng, mnuih ƀuôn sang, boh nik hŏng phung mda asei kơ dŭm boh tŭ dưn mơ̆ng knăm mơak Chrôi Rum Chếk mâo leh Phŭn bruă dhar kreh, mjuăt asei mlei leh anăn hiu čhưn ênguiê tŭ yap jing mnơ̆ng kriê pioh amâodah klă mơ̆ng ala čar, rơ̆ng dưi mkŏ mjing hlăm grăp thŭn, đru mkŏ wĭt leh anăn kriê pioh knăm mơak, knăm mơak knhuah gru, jing knăm mơak knhuah gru, nao mbĭt hŏng dŭm knăm mơak.

Knăm mơak Chrôi Rum Chếk mâo hƀuê ênuk mkŏ mjing sui, dưi kriê pioh lu ênuk gưl. Khădah găn lu wưng hƀuê ênuk, ƀiădah truh kơ ară anei knăm mơak ăt mâo ai lar bra, đĭ kyar jing sa hlăm dŭm knăm mơak êdah êdi mơ̆ng čar Sóc Trăng, iêo jak lu phung tuê nao hgŭm./.