Mnuih Ca Dong dlăng yuôm êdi akŏ êa. Êjai duah lăn mdơ̆ng ƀuôn, khua mduôn tal êlâo ruah anôk mâo akŏ êa. Diñu mdưm pin êa akŏ ƀuôn, anôk doh hĭn. Knăm ngă yang pin êa ăt dưi mkŏ mjing hŏng hdră kdrưh kơăm hĭn.

Mơ̆ng aguah ưm, êkei mniê mnuih Ca Dong mbĭt hŏng phung mduôn ti să Trà Don, kdriêk Nam Trà My, čar Quảng Nam bi mâo djăp ƀô̆ mta ti sang krah ƀuôn. Tinăn dưi mi msiam bŏ hŏng êa mil, hŏng dŭm kdrăp bi msiam kơ knăm ngă yang. Grăp čô bi čŭt hơô kdrăp djuê ana.

Hlăm ênai čĭng kwang hơ̆k kdơ̆k, khua mduôn ngă hdră bhiăn ngă yang. Êlâo sa hruê klei ngă yang, khua mduôn srăng iêo jak phung êkei hlăm ƀuôn ngă dŭm mta bruă msĕ si mdơ̆ng gơ̆ng ngă yang, jah waih êlan trun kơ akŏ êa. Diñu ksiêm dlăng pin êa, tơdah ƀuh rai srăng lŏ bi kjăp, đa đa mlih pin êa mrâo. Mduôn Nguyễn Đức Thường, ti să Trà Don, kdriêk Nam Trà My, čar Quảng Nam brei thâo:

Wưng tal 1 jing bruă mprăp, bi kƀĭn mnuih ƀuôn sang, bi tŭ ư hlăm yang ƀuôn, khua mduon bi klă hruê ngă yang. Leh anăn mbha bruă kơ pô nao koh kyâo, boh nik srăng ruah ana kpă, mbah grăp êpul, mdơ̆ng gơ̆ng ngă yang. Bi kơ akŏ êa, khua mduôn bi kƀĭn mnuih ƀuôn sang čiăng rơ̆ng kơ klei doh..Dliê akŏ êa amâo mâo dưi koh druôm, tơdah ngă soh srăng bi kmhal.

Mdơ̆ng gơ̆ng ngă yang jing bruă tal êlâo leh anăn ăt jing sa hlăm dŭm mta phŭn dưi uêñ mĭn lu hĭn hlăm klei ngă yang anei. Čiăng mâo sa gơ̆ng ngă yang, phung êkei hlăm ƀuôn ngă klei msiam. Diñu bi ngă hrăm mbĭt hlăm dŭm mta bruă. Leh klei ngă yang, phung êdam hlăm ƀuôn mdưm đĭng êa mơ̆ng čư̆ ba êa wĭt kơ ƀuôn sang. Leh êa truh ti pin êa ti djuê gơ̆ng ngă yang, grăp gŏ sang yua đĭng drao tuah êa ba wĭt tŭk knă.

Êjai phung êkei klam bruă bi msiam gơ̆ng ngă yang, mdoh êa mơ̆ng akŏ truh kơ pin êa, phung mniê ti sang srăng ngă klei tŭk knă. Diñu tŭk knă dŭm mta mnơ̆ng ƀơ̆ng knhuah gru msĕ si: ăm êsei brông, tŭk điŏ ki kbao, knă kpiê čeh. Amai Hồ Thị Hằng, ti să Trà Don, kdriêk Nam Trà My, čar Quảng Nam brei thâo: Klei ngă yang pin êa, hruê mbruê sang kâo mkra kpŭng, nao koh đrao, mlam anei knŏng ăm. Đĭng êa mđoh êa ăt mprăp leh. Anei jing knhuah gru djuê ana pô tinei. Mă êa anei knă êsei, tŭk kđeh čĭm čiăng ngă yang, hmăng hmưi kơ thŭn êdei srăng mâo klei myun mdan, mâo lu boh mnga, anak čô dưi nao sang hră mơar.

Đinh Văn Vượng, Khua bruă sang čư̆ êa să Trà Đòn mñă klă, klei ngă yang pin êa jiă kma knhuah gru mơ̆ng bruă lŏ hma, ƀi êdah klei đăo knang mơ̆ng mnuih Ca Dong leh anăn mnuih ƀuôn sang gĭr bi djă pioh.

Anei jing wưng kơ mnuih ƀuôn sang bi kƀĭn, bi hâo hưn kơ hdră răng mgang dliê, răng mgang hnoh êa, ƀuôn sang, bi kah mbha klei hriăm mă bruă, rông mnơ̆ng…Mbĭt anăn jing klei găl kơ mnuih ƀuôn sang, bi hơêč hmưi sa thŭn mă bruă, bi mđĭ ai hlăm thŭn mrâo. Hlăm wưng kơ anăp, hmei lŏ dơ̆ng bi lar boh tŭ knăm mơak čiăng kriê pioh dhar kreh mơ̆ng djuê ana pô.

Hlăm klei ñŭ kma ară anei, klei bi mjĕ dhar kreh plah wah dŭm djuê ana hmăi kơ klei hdĭp, dhar kreh mơ̆ng mnuih ƀuôn sang mâo dŭm klei mlih, bruă rơ̆ng kơ klei ngă yang pin êa mâo boh tŭ dưn đru mguôp hlăm bruă kriê pioh knhuah gru dhar kreh dŭm djuê ana ti krĭng čư̆ čhiăng Quảng Nam. Mbĭt anăn jing tur knơ̆ng kriê pioh, đru hlăm klei đĭ kyar klei hdĭp, yang ƀuôn ti alŭ wăl.