Aguah 27/3, Knơ̆ng bruă sang čư̆ êa kdriêk Phú Thiện mkŏ mjing leh knăm akâo hjan mơ̆ng Yang Pơtao Apui leh anăn klei bi lông dhar kreh - mjuăt asei mlei mnuih djuê ƀiă tal XVI ti wăl hƀuê ênuk - dhar kreh ala čar Plei Ơi (să Ayun Hạ, kdriêk Phú Thiện, čar Gia Lai) kñăm hưn mdah mnơ̆ng kriê pioh dhar kreh leh anăn klei găl bruă duh mkra - ala ƀuôn, iêo jak phung tue leh anăn phung bi liê hlăm bruă hiu čhưñ ênguê.

Knăm ngă yang akâo hjan mkŏ mjing ti čư̆ Tao Yang, Siu Phơ, pô đru ênuk Mtao Pui tal 14, mbĭt hŏng êpul gơ̆ng khua mduôn leh anăn phung mbruă đru gĭt gai. Klei riu yang akâo kơ lăn adiê brei êa hlĭm hjan bi jăk, êklăk êklai ana kyâo mtâo rơ̆k tơ̆k bluh mda ba klei mơak, klei ktang kơ mnuih ƀuôn sang. Mbĭt anăn mâo klei bi lông dhar kreh mjuăt asei mlei, hŏng lu bruă ngă lu jơr msĕ si tông ccing, hrĭ mñam, krah rup hŏng kyâo, pơ̆k mñam, leh anăn klei bi lông đĭ kwưng, mnah hna leh anăn kdăt klŭng. Boh nik, klei bi lông êran mâo anăn “Tui hlue knhuang jơ̆ng Mtao Pui” bŏ hŏng klei kdrăm kơah hlăm knăm mơak.