Hŏng akŏ “phiơr dlông čư̆ čhiăng”, Hruê knăm kpŭng đung hŏng êwa čuh Dak Lak 2025 mkŏ mjing mơ̆ng hruê 1/5 – 3/5 ti să Krông Ana, kdriêk Ƀuôn Đon. Hruê  mâo 12 kpŭng đung, hlăm anăn mâo 10 boh kơ phung tuê lông đĭ ti Ƀuôn Đon leh anăn 2 boh rang mdah ti wăl tač hruê 10/3 (ƀuôn prŏng Ƀuôn Ama Thuôt).

Ênoh hră đĭ mơ̆ng ti Ƀuôn Đon jing mơ̆ng 140.000 – 800.000 prăk. Mmông đĭ mơ̆ng 5 – 10 mnĭt, ti boh dlông 50m. Mbĭt hŏng anăn, phung tuê lŏ dưi nao hgŭm hlăm dŭm mta bruă dhar kreh, mjuăt asei mlei msĕ si klei tông čing, ênhiang mmuñ êlan dơ̆ng, rang mdah rup, dŭm mta mnơ̆ng ƀơ̆ng phŭn leh anăn mnơ̆ng jăk yâo alŭ wăl.

Phạm Trung Nghĩa, khua bruă sang čư̆ êa kdriêk Ƀuôn Đon brei thâo, hdră mâo lu gưl phiơr kơ phung tuê. Bruă anei mơ̆ng anôk bruă mâo klei thâo hlăm klei phiơr klam ngă čiăng rơ̆ng kơ klei êđăp ênang hŏng phung tuê:

 “Anei jing gưl tal êlâo sa hră hnơ̆ng prŏng hŏng klei ktuê dlăng hŏng kpŭng đung hŏng êwa čuh dưi mkŏ mjing ti alŭ wăl. Hdră bruă anei amâo djŏ knŏng klei hlăp mbŭl ƀiădah lŏ jing kdrông mkŏ čiăng hưn mdah dhar kreh, klei găl bruă hiu čhưn ênguê, boh nik jing  jing knhuah gru dŭm djuê ana Lăn Dap Kngư hŏng mah jiăng tar rŏng lăn. Hmei đăo knang, hŏng klei sa ai mơ̆ng phung tuê leh anăn mnuih ƀuôn sang, hruê knăm kpŭng đung hŏng êwa čuh Ƀuôn Đon srăng jing gru kruăk, đru ba Ƀuôn Đon jing anôk truh hlăm bruă hiu čhưn ênguê Việt Nam”.

Êngao kơnăn, phung tuê hriê ti Dak Lak hlăm wưng hruê 30/4 – 1/5 thŭn anei dưi ktuê dlăng dŭm mta bruă dhar kreh, mjuăt asei mlei jăk yâo ti alŭ wăl msĕ siklei tông čing, ênhiang mmuñ êlan dơ̆ng, rang mdah rup, dŭm mta mnơ̆ng ƀơ̆ng dŭm djuê ana. Trần Hồng Tiến, Khua knơ̆ng bruă dhar kreh mjuăt asei mlei leh anăn hiu čhưn ênguê čar Dak Lak brei thâo:

“Dŭm mta bruă mkŏ mjing hlăm 4 hruê čiăng kơ tuê dưi ktuê dlăng. Êngao kơ čuă dlăng hlăm yang hruê, năng ai ti Ƀuôn Đon, Lăk amâodah đa đa anôk hiu čhưn ênguê, lông đĭ kpŭng đung hŏng êwa čuh. Bi mmông mlam lŏ dưi ƀơ̆ng mnăm dŭm mta jăk msĕ si kphê, ênhiang mmuñ Lăn Dap Kngư leh anăn čuă dlăng dŭm wăl kriê pioh, anôk siam hlăm alŭ wăl. DŬm mta mnơ̆ng dhơ̆ng anei hmei ăt bi mguôp hŏng dŭm knơ̆ng bruă čiăng hluê ngă”.