Hla knŭng mda ƀơ̆ng ƀuhƀăl, êjai ƀơ̆ng ƀuh đrêñ leh anăn êbơr. Hla knŭng kreh pĕ hlăm yan bhang, êjai ana mâo lu knăt mda. Mnuih Êđê kreh ƀơ̆ng mtah hla knŭng mda, ƀơ̆ng mbĭt hŏng dŭm mta hla djam mkăn, amâodah tak hŏng êa măm, boh nik jing lŭk hŏng kan, tlê hŏng kan hrô leh anăn kan hul. Amai H’Lop Niê ti ƀuôn Sah B, să Ea Tul, kdriêk Čư̆ Mgar, čar Dak Lak brei thâo, hla knŭng mda ƀăl ƀơ ƀiă, mbĭt hŏng klei hăng mơ̆ng amrêč, ba mbĭt mnâo mnañ mơ̆ng čư̆ dliê Lăn Dap Kngư jing mta phŭn bi mâo mñâo mnañ jăk kơ hla knŭng mda tlê hŏng kan hŭl.

     “Mta mnơ̆ng ƀơ̆ng anei jăk êdi. Anei jing kan hŭl tlê hŏng hla knŭng mda. Kan amâo mâo mă ôh kŏ leh anăn klang, hla knŭng mda mă ti ktuê hnoh êa, hlăm hma, leh anăn ba tlê hŏng amrêč, mnơ̆ng bi ƀăt leh anăn êsŭn Êđê. Mta mnơ̆ng ƀơ̆ng anei mâo hlăm klei huă ƀơ̆ng aguah tlam mơ̆ng mnuih Êđê mơ̆ng đưm leh.

Êjai yang hruê mrâo đĭ, mnuih Êđê bi mprăp mnơ̆ng nao kơ hma. Êngao kơ dŭm boh bŭng ktrŏ, amâo mâo dưi kƀah ôh dŭm mta mnơ̆ng ƀơ̆ng huă yang hruê kơ sa hruê mă bruă. Leh anăn hla knŭng mda tlê hŏng kan hul kreh huă mbĭt hŏng êsei hlơr leh anăn djam mtah, mkŏ mjing mmông huă ƀơ̆ng nao đŏk kƀông êdi.

Amai H’Đô Niê, ti ti ƀuôn Sah B, să Ea Tul, kdriêk Čư̆ Mgar, čar Dak Lak brei thâo, mkra mjing mta mnơ̆ng ƀơ̆ng anei jing ênưih, ƀiadah čiăng mâo klei nao đŏk kƀông ăt čiăng mâo klei mbruă, ênŭm mnơ̆ng bi mbăt mơ̆ng pô tŭk mkra.

 “Hla knŭng mda yan nei yơh jing jăk hĭn, lĕ hjan amâo mâo lŏ jăk ôh, hla knŭng khua hĕ, amâo mâo lŏ đrêč leh anăn mda ôh. Mta mnơ̆ng ƀơ̆ng anei mâo hlăm čư̆ dliê, ana knŭng dưi pla djiêo sang amâodah hlăm hma, hlăm dliê. Bi kan dưi nao wah ti hnoh amâodah ară anei nao blei hlăm sang mnia.”

Kan hŭl tlê hŏng hla knŭng jing sa mta mnơ̆ng ƀơ̆ng knhuah gru jăk yâo mơ̆ng mnuih Êđê, bi êdah klei bruă hlăm klei tŭk mkra mnơ̆ng ƀơ̆ng. Mnơ̆ng ƀơ̆ng anei kreh dưi yua hlăm mmông huă ƀơ̆ng aguah tlam, amâodah dŭm knăm mơak mơ̆ng ƀuôn sang. Boh nik hlăm mlan 3, êjai lăn adiê Lăn Dap Kngư dôk hlăm yan mnga, mta mnơ̆ng ƀơ̆ng anei amâo djŏ knŏng mâo mnâo mnañ mơ̆ng čư dliê ƀiădah lŏ bi mguôp êpul êya yang ƀuôn leh năn mpŭ mơ̆ng mnơ̆ng adiê brei./.