Lơ Mu K’Poh (mnuih K’Ho- Cil) êbeh 70 thŭn, ti alŭ Srê Đăng, Să tân Hội, čar Lâm Đồng brei thâo: Knăm bi anăn kơ hđeh mrâo kkiêng jing hdră bhiăn mdê hĭn. Anei jing wưng bi êdah klei hơ̆k mơak mơ̆ng gŏ sang, hưn hŏng êpul êya, ƀuôn sang thâo kơ sa čô mrâo hlăm gŏ sang:

       “ Leh wưng ba tian, truh kơ hruê kkiêng anak, leh anăn gŏ sang mkŏ mjing knăm bi anăn hluê hdră bhăn djuê ana hmei. Hmăng hmưi êdei anăp hđeh anei suaih pral, đĭ hriê kơ prŏng jing sa čô tŭ dưn, tui msĕ amĭ ama”.

     Leh kkiêng anak ĭ mâo sa hruê kăm, gŏ sang mkŏ mjing knăm bi anăn. Tơdah gŏ sang ka dưi ngă klei huă ƀơ̆ng, diñu srăng ngă bi hmô čiăng kơ hđeh mâo anăn. Êlâo kơ mkŏ mjiing, gŏ sang srăng iêo phung khua mduôn, phung mâo kơhưm, amâodah amiêt awa hlăm nao bi trông. Liêng Hót Ha Kliêng (mnuih K’Ho Cil) ti ti alŭ Srê Đăng, Să tân Hội, čar Lâm Đồng  brei thâo, mnơ̆ng myơr leh anăn mnơ̆nh ƀơ̆ng hlăm knăm bi anăn mơ̆ng mnuih K’Ho ăt hluê si klei găl mơ̆ng gŏ sang.

“Mâo ŭn čuh ŭn, mâo mnŭ čuh mnŭ, hŏng klei hmăng hmưi kơ hđeh anei suaih pral, amâo mâo klei dleh dlan hlăm klei hdĭp, mâo klei êđăp ênang leh anăn myun mdan. Leh anăn pô bi ala gŏ sang srăng iêo khua mduôn rueh adhei leh anăn hơêč hmưi kơ hđeh mâo klei êđăp ênang, hŏng klei hmăng hmưi kơ hđeh dưi đuê̆ mơ̆ng klei jhat, amâo ngă klei bi kah. Êdei dih, hriê kơ prŏng mâo ai tiê jăk, đru mkŏ mjing ƀuôn sang, anăn jing klei yuôm bhăn hĭn mơ̆ng knăm bi anăn mơ̆ng mnuih K’Ho hmei.

          Anăn mơ̆ng mnuih K’Ho Cil mâo boh tŭ dưn, bi êdah klei lŏ čuê mơ̆ng găp djuê leh anăn krĭng dôk mơ̆ng êpul êya. Kyuanăn êlâo kơ bi anăn, gŏ sang srăng êmuh phung thâo kơ phŭn agha djuê ana, phung mduôn, phung mâo kơhưm, čiăng ruah anăn djŏ guôp. Hŏng K’Ho čil ti Tân Hội, kreh iêo kơ hđeh mniê jing K’Jiêng, K’Ba, bi êkei jing Ha Liang, Ha Kră, Ha Ôñ… Liêng Hót Ha Kliêng brei thâo, anăn jing anăn bi mguôp hŏng dŭm gru mngač hlăm hƀuê ênuk djuê ana, êjai dưi bâo hlăm êpul êya,mnuih K’Ho ktưn hưn êdi.

       “Hluê si hdră bhiăn djuê ana hmei, čiăng bi anăn kơ hđeh srăng ruah anăn phung thâo kơ khăp ƀuôn sang, mâo ai rŭ mdơ̆ng ƀuôn sang mrâo kơh mă anăn kơ anak. Bi phung jhat amâo mâo lŏ bi anăn ôh. Phung mniê sơnăn mơh, hlei pô jing gru mngač pô mă anăn kơ anak. Msĕ si K’ Huệ, K’Ba, Ha Liang, Ha Kră … anăn jing dŭm anăn gŏ sang ruah kơ anak pô, kyua diñu mâo klei thâo khăp, thâo kah mbha, kơup mgang hdơ̆ng pô leh anăn đru mkŏ mjing, răng mgang ƀuôn sang”.

Dưi lač, knăm bi anăn mơ̆ng mnuih K’Ho Čil ti Lâm Đồng amâo knŏng jing hdră bhiăn dhar kreh, ƀiădah lŏ jing klei hưn mtă mtăn kơ grăp gưl thâo mpŭ kơ phŭn agha, djăp pioh knhuah siam aduôn aê. Hŏng grăp anăn, klei khăp mơ̆ng gŏ sang, klei hmăng hmưi kơ sang klei hdĭp êđăp ênang, suaih pral leh anăn bi mguôp dưi hmăng hlăm hđeh anăn. Ti krah klei hdĭp mrâo mrang, knăm bi anăn ăt dưi krơ̆ng bruă klam yuôm bhăn, mkŏ êlâo dih – ară anei leh anăn êdei anăp, rông ba ai tiê leh anăn knhuah gru djuê ana K’Ho Cil.