Đinh Quốc Tuấn, Khua dhar bruă djuê ana čar Kon Tum yăl dliê, mbĭt hŏng klei mđĭ kyar duh mkra ala ƀuôn jhlăm krĭng mnuih djuê ƀiă, bruă kriê pioh lehanăn bi lar knhuah gru dhar kreh čing čhar mâo nanao klei mđing uêñ, mâo ngă leh hŏng lu hdră jăk.  Truh ară anei, mâo leh 2.500 rĭng čing čhar mâo dŭm djuê ana bi kriê pioh, lehanăn dôk djă yua, boh nik hlăm dŭm knăm mơak dhar kreh – kđi čar hlăm čar mkŏ mjing. Anei jing mmông phung knhăk hŏng čing bi êdah klei mbruă pô thâo mdêč čĭng, đru kơ phung hđeh gưl mrâo thâo ƀuh klei tŭ dưn mơ̆ng čing čhar, klei bi kdŏ čhuang, mâo klei uêñ klam hĭn hlăm bruă kriê pioh, lehanăn bi lar klei tŭ dưn yuôm bhăn anăn.

Nao hlăm “Mlam mdah klei tông čing čhar, kdŏ čhuang mơ̆ng dŭm djuê ana čar  Kon Tum” mâo truh 170 čô mnuih mbruă mơ̆ng 8 êpul. Hlăm anăn mâo 7 êpul bi ala kơ 7 djuê ana hlăm čar, mâo: Xơ Đăng, Bahnar, Giẻ -Triêng, Jarai, Brâu, Rơ Măm lehanăn Hrê. Hlăm mlam knăm mơak anăn, phung knhăk kah leh lu mmông mâo klei mjĕ mjuk, bi yăl dliê kơ dhar kreh dŭm djuê ana pô hŏng 245 čô phung bi ala nao hlăm knăm kƀĭn prŏng dŭm djuê ana čar Kon Tum tal IV. Pô mbruă Ri Ang, djuê ana Xơ Đăng, ti ƀuôn Kon Vơng Kia, wăl krah Măng Đen, kdriêk Kon Plông, brei thâo:

“Êpul tông čing hmei mâo 17 čô hriê kơ anei mdah klei tông čing čhar čiăng kkuh mơak klei bi kƀĭn prŏng djăp djuê ana. Klei hmei hriê mdah tông čing anei čiăng kơ jih jang mnuih thâo kơ ênhiang čing čhar, lehanăn klei bi kdŏ čhuang mơak kơ ƀuôn sang mlih mrâo. Kâo mơak kyua mâo nao hlăm klei mjĕ mjuk êjai hlăm mmông mdah klei tông čing čhar, tinăn mâo tuôm hŏng lu ƀĭng tông čing čhar djuê ana mkăn hlăm čar Kon Tum. Kâo bŏ hŏng klei mơak êdi”.

Dŭm klei mdah tông čing, kdŏ čhuang “Mơak klei bi kbĭn mơ̆ng phung mbruă djuê ana Bahnar, kdriêk Đăk Hà; klei tông pĕ hŏng klei čih “hdơr kơ Đảng, kơ awa Hồ”, djuê ana Giẻ-Triêng, kdriêk Đăk Glei; klei ayŭ Đinh Pú “Răng kriê hma pưk”, djuê ana Brâu, kdriêk Ngọc Hồi; “Mơak hrue ƀuôn sang mnăm huă”, mơ̆ng djuê ana Bahnar, ƀuôn prŏng  Kon Tum... nâo hlăm mta kñăm jing “Mlam mơak čing čhar kwang kơ phŭn agha ana hruĕ, hŏng klei bi mguôp jih jang djuê ana čar Kon Tum”. Pô knhăk Phạm Văn Hân, Khua anôk bruă dhar kreh kdŏ mmuiñ čar Kon Tum, brei thâo, anei jing dŭm mta kñăm jiă knhuah gru dhar kreh mơ̆ng 7 djuê ana hlăm čar adôk kriê pioh:

“Jih jang klei mdah anei jiă knhuah bhiăn djuê ana, bi ala leh kơ čar bi êdah lu knhuah gru mơ̆ng dŭm djuê ana mdê mdê. Mâo msĕ si klei muiñ mjum, klei tông čing čhar, klei kdŏ čhuang, klei jum tue lehanăn dŭm ênhiang jiă hĭn êdi mơ̆ng mdê bi djuê ana. Mlam mdah anei bi knăl leh klei thâo bi mguôp jih jang djăp djuê ana hlăm čar  Kon Tum”.

Pô mbruă A Thút ti să Mường Hoong, kdriêk Sa Thầy bi êdah klei mơak leh dưi ƀuh lu êpul tông čing hlăm knăm mơak anei. Boh nik, êjai dŭm êpul phung tông čing, lehanăn kdŏ čhuang mâo lu phung êdam êra, nao mdah hlăm djăp mta klei mơ̆ng djuê ana pô, klei anei đru leh hlăm bruă kriê pioh, bi lar knhuah gru dhar kreh dŭm djuê ana ti čar   Kon Tum.

Mlam knăm mơak jing leh wưng čiăng kơ phung mbruă mâo klei bi tuôm, bi mjĕ mjuk, hyuă kjăp hĭn klei thâo bi mguôp hlăm ƀuôn sang, lehanăn bŏ hŏng klei hơ̆k mơak kơ djuê ana hlăm bruă thâo bi kriê pioh, lehanăn mđĭ bi lar dhar kreh đưm./.